ގދ. އަތޮޅުމަދަރުސާގެ ދަރިވަރުންގެ އަޚްލާގީ މިންގަނޑު ގޯހުން ގޯހަށް

ގދ. އަތޮޅުމަދަރުސާގެ ދަރިވަރުންގެ އަޚްލާގީމިންގަނޑާއި ކިޔެވުމުގެ ފެންވަރު އެއްދުވަހުން އަނެއް ދުވަހަށް ގޯސްވަމުންދަނީ ކަންބޮޑުވާހާ ހަލުވިމިނެއްގައެވެ. މިއަދުގެ ސްކޫލް ދަރިވަރުންނަކީ އަޅުގަނޑުމެންގެ މުސްތަގްބަލް އުޖާލާ ކޮށްދޭން ތިބި މާދަމާގެ ޒުވަނުންނަށްވާއިރު މިކުދންގެ ފަރާތުން ފެންނަމުންދަނީ އަޅުގަނޑުމެން ދެރަވެ ލަދު ގަންނަން ޖެހޭ މަންޒަރުތަކެކެވެ.

އިވޭ އަޑުތަކާއި ފެންނަ މަންޒަރުތަކަކީ ހަގީގަތް ކަމަށްވާނަމަ ދަންނަވަން ޖެހޭނީ ސްކޫލްގެ ބައެއް ދަރިވަރުންގެ އަޚްލާގީ މިންގަޑު ހައްދު ފަހަނަޅާފައި ތިބި ކަމެވެ. ގޯސްވެގެން ބަޔަކަށް ކުރެވޭނެ އިތުރު ކަމެއް ނޯންނާނެއެވެ. މިދަނަންވާ ކަންތައް ތަކަކީ މަސްތުވާ ތަކެއްޗާއި ބަދު އަޚްލާގީ އަމަލް ތަކެވެ.

މުޖްތަމައު ގެ ތެރޭގައި މިހާރު އެންމެ ގަދަޔަށް ދެކެވޭ އެއް ވާހަކަ އަކީ ގދ. އަތޮޅުމަދަރުސާގެ ބައެއް ދަރިވަރުން މަސްތުވާ ތަކެތީގެ ވަބާގައި ޖެހިފައިވާ ވާހަކަ އާއި ބަދު އަޚްލާގީ އަމަލްތައް ފާޅުގައި ހިންގާ ވާހަކައެވެ. އަދި ދާދި މިދާކަށް ދުވަހު މަދަރުސާގެ ޓީޗަރެއްގެ ބަދު އަޚްލާގީ ވީޑިއޯއެއް ބަލައިގެން ދަރިވަރުންތަކެއް އެފަދަ އަމަލުތަކެއް ހިންގާފައިވާ ކަމަށް ވެސް އަޑުފެތުރިފައި ވެއެވެ. އެހެންކަމުން މިފަދަ ކަންތައްތަކަކީ އަޅުގަނޑުމެން އެއާއި މެދު އަޅާ ނުލާ ދޫކޮށްލަން ޖެހޭ ކަންތަކެއް ނޫނެވެ. މިކަމާއި ދެކޮޅަށް މަސައްކަތް ކުރުމަކީ އަޅުގަނޑުމެންގެ ކޮނޑުގައި އެޅިފައިވާ ވަރަށް ބޮޑު މަސްއޫލިއްޔަތެކެވެ.

ކުއްޖާގެ އަޚްލާގު ގޯސްވާނީ ހަމަ ކުއްލިއަކަށް ނޫނެވެ. އެންމެ ފުރަތަމަ ކުއްޖާ ކުށްކުރަން ދަސްކުރަނީ ގޭތެރެއިންނެވެ. ގޭތެރޭގައި ކުއްޖާ ކުރާ މިފަދަ ކުށްތަކަށް މާ ބޯޑު އަޅާލުމެއް ނުލިބުމުގެ ސަބަބުން މަޑުމަޑުން އެކުއްޖާ ކުރާ ކުށްތައް ގިނަވެ އިތުރުވެއެވެ. އަދި އާޚިރުގައި މިކުއްޖާ ވަނީ ބޮޑެތި ކުށްތަކަށް އަރައިގަންނަ މުޖްތަމައަށް ހުރި ނުރައްކަލަކަށެވެ. ވީއިރު މިކަމުގައި އެންމެ ބޮޑަށް ޒިންމާ އުފުލަން ޖެހޭ ފަރާތަކީ ކުއްޖާގެ މައިން ބަފައިންނެވެ. ފުރާވަރަށް އަރައިގެން އަންނައިރު ކުއްޖާ އަށް އާދަޔާ ޚިލާފު ސަމާލުކަމެއް ދޭން އެބަޖެހެއެވެ. މިގޮތުން ކުއްޖާ އުޅޭ ނޫޅޭ ގޮތް ވަރަށްގާތުން ބަލަން އެބަޖެހެއެވެ. ކުއްޖާ ރައްޓެހިން ގެ ގޮތުގައި އިޚްތިޔާރު ކުރަނީ ކޮންބައެއްތޯ ބަލަން އެބަޖެހެއެވެ. ކުއްޖާގެ ކިޔެވުމަށް އަންނަ ބަދަލުތަކާއި މެދު ސަމާލުވާން އެބަޖެހެއެވެ. އެންމެ ކުޑަމިނުން ކުއްޖާ މަދަރުސާއިން ދޭފިލާވަޅުތައް ބަރާބަރަށް ނިންމާތޯ  އާއި ފޮތްތަކާއި ޕޭޕަރު ތަކުގައި ރަނގަޅު ފާހަނގަ ލެވިފައިވަނީ ކިހާވަރަކަށް ތޯއާއި ނުބައިފާހަނގަ ލެވިފައިވަނީ ކިހާވަރަކަށްތޯ ބެލިދާނެއެވެ. އެއިރުން ކުއްޖާއަށް ތިމާގެ ކިޔެވުމަށް ބެލެނެވެރިޔާ ސަމާލުކަން ދޭކަން އެނގުމުގެ ސަބަބުން ކިޔެވުމަށް ފަރުވާ ކުޑަކުރުމުގެ ފުރުސަތު ހަނިވެގެން ދާނެއެވެ. އެހެން ކަމުން ބެލެނެވެރިން ހޭލުންތެރިވުމަކީ އެންމެ ފުރަތަމައިނުންންވެސް ކުރަން ޖެހިފައިވާ އެންމެ މުހިއްމު އެއް ކަންތަކެވެ.

ހަމަ އެއާއި އެއްގޮތަށް މަދަރުސާގެ ހަތަރު ފާރުގެ ތެރޭގައި ކުއްޖާ ހޭދަކުރާ ވަގުތަކީ މިފަދަ ގޮތަކަށް ކުއްޖާގެ އުޅުން ބަދަލުވާން ލިބޭ ފުރުސަތު ތަކަކަށް ވެގެން ނުވާނެއެވެ. މަދަރުސާގެ އިދާރާއިން ވަރަށް ފަރުވާތްތެރިކަމާއި އެކު ކުދިންގެ ކިޔެވުމާއި އަޚްލާގަށް ސަމާލުވާން ޖެހޭނެއެވެ. އެކުދިންނަށް ނަސޭހަތާއި އިރުޝާދު ދޭންޖެހޭނެއެވެ. މަދަރުސާއިން ކުއްޖާގެ ކިޔެވުމުގެ އެންމެ ފުރަތަމަ މަރުހަލާގައިވެސް އެކުއްޖާގެ ކިޔެވުމަށް ޚާއްސަ ސަމާލުކަމެއް ދޭންޖޭނެއެވެ. އަޅުގަނޑުމެންނަށް އާންމު ކޮށް ފެންނަނީ ދަށްގްރޭޑްތަކުގެ ތަކުގެ ކުދިންނަށް ނިސްބަތުން ފެންވަރު ދަށް މުދައްރިސުން ކިޔަވައިދޭތަނެވެ. އަދި މަތީ ގްރޭޑް ތަކަށް ދިޔުމާއި އެކު ކުދިންގެ ކިޔެވުމަށް އިތުރު ސަމާލު ކަން ދޭމަންޒަރެވެ. ނަމަވެސް މިވާ ގޮތަކީ ދަށް ގްރޭޑްތަކުން ކުއްޖާގެ ފެންވަރު ދަށްވުމުގެ ސަބަބުން މަތީ ގްރޭޑާއި ހަމައަށް ދާއިރ ކުއްޖާއަށްފިލާވަޅުގައި ބުނާ އެއްޗެއް ދޭހަނުމުގެ މައްސަލަ ދިމާވާތީވެ ކިޔެވުމުގެ މަތިން ފޫހިވާ ގޮތްމެދުވެރިވެއެވެ. އަދި މަޑުމަޑުން ކުއްޖާގެ އަޚްލާގަށްވެސް އެކަމުގެ ނޭދެވޭ އަސަރުފޯރަންފަށައެވެ.

އަޅުގަނޑުގެ އަމިއްލަ ލޮލޮން މަދަރުސާގެ ދަށްގްރޭޑް ތަކުގެ ކުދިންގެ ބައެއް ފޮތްތައް ބާލުލުމުގެ ފުރުސަތު ލިބުނެވެ. އަޅުގަނޑަށް މިގޮތުން ފާހަނގަ ކުރެވުނު ގޮތުގައި ބައެއް ރަނގަޅު ޖަވާބު ތަކުގައި ވަރަށް ގިނައިން ނުބައި ފާހަނގަ ލުމުގެ އިތުރަށް ނުބައި ޖަވާބުތަކުގައި ރަނގަޅުފާހަނގަ ލާފައިވާ މަންޒަރުތައް ފެނިފައިވެއެވެ. މުދައްރިސަކަށް އޮޅިގެން ރަނގަޅު ޖަވާބެއްގައި ނުބައި ފާހަނގަ އަދި ނުރަނގަޅުޖަވާބެއްގައި ރަނގަޅު ފާހަނގަވެސް ލެވިދާނެއެވެ. ނަމަވެސް މިއީ ތަކުރާރުވާ ކަމެއްނަމަ އެކަމަކީވަރަށް ސީރިއަސް މއްސަލައެކެވެ. މިއިން އެނގޭ އެއްޗަކީ ކުއްޖާގެ ކިޔެވުމަށް މުދައްރިސްފަރުވާ ކުޑަކުރާކަމާއި ސުޕަވައިޒަރުންނަށް އެފަރާތްކުގެ ޒިންމާ އަދާނުކުރެވޭ ކަމެވެ.

އެހެންކަމުން ކުދިންގެ އަޚްލާގާއި ކިޔެވުމުގެ ކަންތައް ނުބައިން ނުބަޔަށް ދާއިރު މިކަމާއި ދޭތެރޭގައި ޒިންމާ ނަގަން ތިބި ފަރާތްތައް ހަނު ހިމޭނުން ތިބެގެން ނުވާނެއެވެ. މިނިސްޓްރީ އޮފް އެޑިއުކޭޝަނާއި، އިސްލާމީ ކަންތކާއި ބެހޭ އެންމެ މަތީ މަޖިލީހާއި، މިނިސްޓްރީ އޮފް ޖެންޑަރ އެންޑް ސޯޝަލް ސެކިއުރިޓީއާއި، ގައްދޫ އޮފީހާއި ބެލެނެވެރިންނާއި އަދި މުޖްތަމައުގެ ކަމުވޮށިވެގެންވާ އެންމެން އެއްބައިވެގަން މިކަމާއި ދެކޮޅަށް ޕްރޮގްރާމްތަކެއް ހިންގަން އެބަ ޖެހެއެވެ. އަޅުގަނޑުމެން މިކަމާއި ދޭތެރޭގައި އިހްމާލް ވެއްޖެނަމަ މި މުޖްތަމައަކީ ފަސާދަވެފައިވާ ބޭކާރު މުޖްތަމައެއްކަމުގައި ވުމަކީ އެންމެ ގާތުގައިވާ ކަންތަކެވެ.

އަޅުގަނޑުމެންގެ މުޖްތަމައަކީ ޒިންމާދާރު ތައުލީމީ، އަދި މުޖްތަމައު ބަލައިގަންނަ ސިފަތަކެއް ލިބިފައިވާ މުޖްތަމައަކަށް ހަދަން ބޭނުންނަމަ ވަގުތު ނަގާނުލައި މިކަމާއި ދެކޮޅަށް އަވަހަށް މަސައްކަތް ފަށަންވީވަގުތު މިވަނީ ޖެހިފައެވެ.