ގދއަތޮޅު މަދަރުސާގެ 23 އަހަރުގެ ދިގުހަޔާތުގައި އެކަށީގެންވާ ކުރިއެރުމެއް ލިބިފައި ވޭބާ؟
އެސްކޫލްގެ ޔުނިފޯރމް ބޮޑީސް ވަނީ ދާދި ފަހުން އިފްތިތާހް ކޮށްފައި
ސްކޫލްގެ އުމުރުން މިހާރުވަނީ 25 އަހަރު ވާން ގާތްވެފައި
ގައްދޫގެ ގިނަ ދަރިންތަކެއް ތައުލީމް ހާސިލް ކުރަމުންދާ ނުވަތަ ކޮށްފައިވާ ސްކޫލް ކަމުގައިވާ ގދ. އަތޮޅުމަދަރުސާގެ ހަޔާތުގައި 25 އަހަރު ފުރެން ކައިރިވަނީއެވެ. އެހެންނަމަވެސް އުފެދޭ ސުވާލަކީ މަދަރުސާ ގެ ރިހި ޔޫބީލް ފާހަގަ ކުރަން ކައިރިވެފައިވާއިރު ރައްޔިތުން އެމީހުންގެ ދަރިންނަށްޓަކައިކުރާ ބޮޑެތި ހޭދަ ތަކާއި އެއްވަރަކަށް ސްކޫލުން ކުދިންނަށް ކިޔަވައި ދެވޭބާވައެވެ. އިވޭ އަޑުތަކާއި ފެންނަ މަންޒަރުތަކަށް ބަލާއިރު ގަބޫލު ކުރަންޖެހޭ ހަގީގަތަކީ ކުދިންގެ ފެންވަރު އެއްގޮތަކަށް ވެސް ބެލެނެވެރިން އުންމީދު ކުރަމުންދާ މިންވަރަކާއި ކައިރި އަކަށް ވެސް ނުދެވޭ ކަމެވެ. މިހިސާބުން އުފެދޭ ސުވާލަކީ ކުދިންގެ ކިޔެވުމުގެ ފެންވަރު މިހާ ދަށްވާން ޖެހޭ ސަބަބަކީ ކޮބައިބާވައެވެ.
އެއްގޮތަކީ ކުދިން ގަސްދުގައި ނުކިޔަވަނީއެވެ. އެންނޫނީ ޓީޗަރުން ކިޔަވައި ނުދެނީއެވެ. ނޫނީ ކިޔަވައިދޭ ޓީޗަރުންގެ ފެންވަރު ނުހުންނަނީއެވެ. ނޫނީ ބެލެނެވެރިން ކުދިންގެ ކިޔެވުމާއިމެދު އެއްގޮތަކަށް ވެސް އަޅާނުލަނީއެވެ. އެހެންނޫންނަމަ ސްކޫލުގައި ރަނގަޅަށް ކިޔަވައިދެވޭނެ ރިސޯސެއް ނެތީއެވެ. ހަމަ ޔަގީނުންވެސް ކުދިންގެ ކިޔެވުމުގެ ފެންވަރު ދަށްވާން ޖެހޭނޭ މައިގަނޑު ސަބަބު ތަކަކީ މިއީއެވެ. ވީއިރުގައި ގދ އަތޮޅުމަދަރުސާގެ ކުދިންގެ ކިޔެވުމުގެ ފެންވަރު ދަށްވާން ޖެހޭ ސަބަބަކީ ކޮބައިބާވައެވެ. މިއީ ވަރަށް ބޮޑަށް އުފެދޭ ސުވާލެކެވެ.
ހަމަ ޔަގީނުންވެސް ގިނަބެލެނެވެރިން ގަބޫލު ކުރާގޮތުގައި އެމީހުންގެ ދަރިންގެ ކިޔެވުމުގެ ފެންވަރު ދަށްވާންޖެހޭ މައިގަނޑު ސަބަބަކީ ސްކޫލުން އެކުދިންނަށް އެކަށީގެންވާ ގޮތެއްގައި ކިޔަވައި ނުދެވޭތީއެވެ. ކުދިންނަށް ކިޔަވައިދޭ ގިނަ މުދައްރިސުންގެ ފެންވަރު ދަށް ކަމުންނެވެ. ބެލެނެވެރިންގެ މިވާހަކަ އަޅުގަނޑުމެންނަށް ވަރަށްބޮޑަށް ގަބޫލު ކުރެވެއެވެ. ސަބަބީ ގައްދޫގައި ކިޔަވައިދޭ ގިނަ ޓީޗަރުންނަކީ ފެންވަރުގެ ގޮތުން އެހާ ރަނގަޅު ޓީޗަރުން ކަމުގައި ނުވާތީއެވެ. ފެންވަރުދަށް މުދައްރިސުން ކިޔަވައިދޭނަމަ ކުދިންގެ ކިޔެވުމުގެ ފެންވަރު ދަށްވާނޭ ކަމީ ހުރިހާ އެންމެން ވެސް ގަބޫލު ކުރަން ޖެހޭ ހަގީގަތެކެވެ.
އެހެންކަމުން މިހިސާބުން އުފެދޭ ސުވާލަކީ ކިޔަވައިދޭ ޓީޗަރުންގެ ފެންވަރު ދަށް ކަމުން ކުދިންގެ ކިޔެވުމުގެ ފެންވަރު ދަށް ވާންޖެހެނީ ހަމަ އެކަނި ގައްދޫ ސްކޫލުގެ ދަރިވަރުން ބާވައެވެ. ގައްދޫ އަށް ވުރެ މާފަހުން ވުޖޫދަށް އައި، އާބާދީގެ ގޮތުން މާބޮޑުތަންވެސް މަދު ރަށްރަށުގެ ސްކޫލުތައް އަޅުގަނޑުމެން ތިބިގޮތަށް ތިއްބާ ކުރިއަރައިގެން ދިޔައީ ކިހިނެއްވެގެން ބާވައެވެ. ސަބަބެއްކަމަށް ގަބޫލު ކުރެވެނީ ބެލެނެވެރިން އެމީހުންގެ ދަރިންނަށް ކިޔަވައިދިނުމަށް ކިތަންމެ ބޮޑު ޚަރަދު ތަކެއް ކުރަމުން ދިޔަ ކަމުގައި ވީނަމަވެސް އެކުދިންނަށް ދޭންޖެހޭ ސަމާލުކަމާއި އަޅާލުން ދިނުމުގައި އިހުމާލް ވެފައިވާ ތީއެވެ. ބެލެނެވެރީން ސްކޫލަށް ދޭންޖެހޭ އެއްބާރުލުން ވަރަށް ފަހަކާއި ޖެހެންދެންވެސް ވަނީ ނުދެވިއެވެ. އެހެންނަމަވެސް މިފަހަކަށް އައިސް ބެލެނެވެރީން ގެ ފަރާތުން ވަރަށް ބޮޑު އެއްބާރުލުމެއް ސްކޫލަށް ލިބޭ ތަންއެބަފެނެއެވެ. އެހެންނަމަވެސް އަދިވެސް ގިނަބެލެނެނެވެރިން އެމީހުންގެ ދަރިންގެ ކިޔެވުމަށް ދޭންޖެހޭ ސަމާލު ކަމުގައި ތިބީ ޣާފިލް ވެފައެވެ. މިއީ ހޭލުންތެރިކަން ދަށްވުމުގެ ސަބަބުން ވާކަމެއްކަމަށް ވުމަކީވެސް އެކަށީގެންވާކަމެކެވެ. އެހެންނަމަވެސް މުވާސަލާތީ ގޮތުން ލިބިފައިވާ ކުރިއެރުމަށް ބަލާއިރު ބެލެނެވެރިންނަށް އެމީހުންގެ ޒިންމާތައް ނޭނގެއޭ ބުނުމަކީ ގަބޫލު ކުރެވޭނެ ވާހަކަ އެއް ނޫނެވެ.
ކިޔެވުމުގެ ގޮތުން ރަންވަނަ ތަކެއް ހާސިލް ކުރަމުންދަނީ ވަރަށް ބުރަކޮށް އެމީހުންގެ ދަރިންގެ ކިޔެވުމުގެ ކަންތައް ވަރަށް ގާތުން ބަލަމުންދާ ބެލެނެވެރިންގެ ދަރިންނެވެ. އެހެންނަމަވެސް އާދަޔާ ޚިލާފަށް މޮޅު ކުދިން މީގެ ތެރެއިން އިސްތިސްނާވެއެވެ. އެހެން ކަމުން މިހާރަށް ވުރެ ބޮޑަށް ސްކޫލުންވެސް ކުދިންގެ ކިޔެވުމާއި ދޭތެރޭގައި ފަރުވާކުޑަނުކޮށް މިކަމަކީ ކިހާމުހިންމު ކަމެއްކަން ދަނެ ކުދިންގެ ކިޔެވުން ރަނގަޅު ކުރެވޭތޯ މަސައްކަތް ކުރަން ޖެހެއެވެ. އަދި ބެލެނެވެރިންވެސް އެމީހުން ގެ އެންމެ ފުރިހަމަ އެއްބާރުލުން ސްކޫލަށް ދޭންޖެހެއެވެ. މިގޮތުން ފަހަކަށް އައިސް މަޑުމަޑުން ނަމަވެސް ސްކޫލް ހޯދަމުންދާ ކުރިއެރުން ފާހަގަ ކޮށްލަމެވެ. މިކަމަކީ ޓީޗަރުންނާއި ބެލެނެވެރިން ގުޅިގެން މަސއްކަތް ކުރުމުގެ ސަބަބުން ލިބެމުންދާ ކާމިޔާބީތަކެވެ. އެހެން ކަމުން ލިބިފައިވާ ރިސޯސް ތަކުގެ އެންމެ ފުރިހަމަ ބޭނުން ހިފައިގެން އިތުރުކާމިޔާބީ އަކާއި ހަމައަށް ދެވޭތޯ މަސައްކަތް ކޮށްފިނަމަ ރަނގަޅު ކުރިއެރުމެއް ކައިރި މުސްތަގްބަލެއްގައި ލިބުމަކީ ވަރަށް ގާތް ކަމެކެވެ. މިކަމުގައި ސްކޫލުން މިނިސްޓްރީ އަށް މިއަށްވުރެ ބޮޑަށް ޕްރެޝަރ ކޮށްގެންނަމަވެސް ފެންވަރު ރަނގަޅު ޓީޗަރުން ލިބޭތޯ މަސައްކަތް ކުރަންޖެހެއެވެ. މައުލޫމާތު ލިބޭ ގޮތުންނަމަ އެހެންސްކޫލްތަކުންވެސް ދުރާލާ މިނިސްޓްރީއަށް ގޮސް ފެންވަރު ރަނގަޅު ޓީޗަރުން ހޯދުމުގައި ކާމިޔާބީ ހޯދާފައި ވެއެވެ.
އެހެންކަމުން ސްކޫލަށް 25 އަހަރު ފުރޭއިރު ބެލެނެވެރިންގެ ހިތްތަކަށް ވެރިވެފައިވާ ނުތަނަވަސް ކަމަށް އެދެވޭ ހައްލެއް ހޯދުމަށްޓަކައި މިއަށްވުރެ ބޮޑަށް މަސައްކަތް ކުރަންޖެހޭ ކަމަކީ ޝައްކެއް އޮތް ކަމެއް ނޫނެވެ. އަޅުގަނޑުމެންގެ އުންމީދަކީ އަވަސް ކުރިމަގެއްގައި ގދ އަތޮޅު މަދަރުސާ ތައުލީމީ ގޮތުން ރަން ވަނަތަކެއް ހަސިލް ކުރަމުންދާ މަންޒަރު ފެނުމެވެ. އެންމެން ގުޅިގެން މަސައްކަތް ކޮށްފިނަމަ މީކީ މާކަ އުނދަގޫ ކަމަކަށް ނުވާނެއެވެ.
ރަށްޓެއްސަކަށް އީމެއިލް ކުރުމަށް
ޕްރިންޓް ކުރުމަށް
ހަމަ އެކަނި ޓެކްސްޓް
އުފަން ގައްދޫ ކުދިން ... ބޮޑެތިވަމުން އައްނަ އަޅުގަނޑުމެން ކަހަލަ ކުދިން..........
މީހެނެ އެކުވެގެން ބޮނެ ހެދީ ވެހެ ފަންޑީތޯގެ އަސަރެ
މިހިދެ ތިފެނެންނޫ. އެވޭލޭޔަސް އެންމެގަދެ އަޑާއްކޫ ފެންވަރެރަނގަޅެ
ޓީޗަރުނެނެތި ވާހަކެޔާ.އަދި އެވޭލޭ ބޮނަމުން އައުއެވާހަކެޔާ ތިޔައްޓަންގަސްހުތުރުކޮށް. ތީފެލާންނަގެ ކުއްދުންނައްޓަންގަސް ތިތާތެއި ޓީޗަރުންނަގެ ފެންވަރެ ދަޓެކަމަށް. އެ ޓީޗަރުނެ ހަމަ އެ
ތެއި ފެންވަރުގައި މާލޭގެ ބޮނޑެތި އިސްކޯލުތަކުގެ މައްތޭ ކިލާސްތަކަށް ކޭވެއިދެމުން އެޔަނެވޭލޭ މިތާ ބެލެނެވެރިޔަކުނާސް އަދި އިސްކޯލަކުންގަސް ގައްދޫ ޓީޗަރަކުނަށް އަދި މިފަދެ ހުތުރު އެއްވިޔަސް ބަހިކެ ރައްދު ނުކެރަތާ. މިބޮނީ ދެ ފަރާތުންގަސް ލެބެމުން އެޔަންނޫ އަދިޔަސް ތާރީފެ. އެހެންމާއި ގައްދޫ ގިނެ މީހެންނަގެ އަޚުލާގެ ދަޓެކަމާއި ތަންދޮރެ ނުފެލެއިތެއިޙާލު ތޮޅީ ބޭކާރެ އަނގެތަކުން ގައްދޫ ގިނެ ޓީޗަރުނެ ރަޓުން އެރެނެ ޖެހުންނޫ. ދެންގަސް ތިތަޅަނެ އަނގެ ނުތަޅެއި ތިތާތެއި ބައިކެންނަށް ތަރުޙީބުދީ އެފެލާންނަށް އެއްބާރެލުން ދީއެފެލާންނަށް އިޙުތިރާމުކޮޓެ ހަދަނެހިދީގަތެފަހޭ ކުއްދުންނަގެ ހިތުގައްޔަސް ޓީޗަރުންނާއިމެދު ޤަދެރާއި އިޙުތިރާމެ ހިނގައިކޭވުމަށް ސަމާލުކަންދިނުން އިނތިރިވެ އޭގެ ހެޔޮ ނަތީޖާ ފެނެމުން އެޔަނެ ފައްޓަންނެއިކަމާއިމެދު ޝައްކެކެ ނެތި.އެހެންނުންފަހޭ ގައްދުވާ ތިކަހަލޭ އެއްވިޔަސްކަމަކުން ދޮހާކުވަސް މުޅެ ހޮވަންނެއިތަނެކެ ނުއެންނެއި.
ކޮމެންޓްސް ފުނުއްވާ