ގައްދޫ ރަށްވެހިގޭގެ ވަށާފާރު އުސްކުރުމުގެ މަސައްކަތް ފައްޓައިފި

31 ދުވަހުގެ ތެރޭގައި ނިންމާގޮތަށް ފާރުގެ މަސައްކަތް ހަވާލުކޮށްފައިވަނީ ސަރިންދާގެ އަހުމަދު ރަޝީދާ

ގައްދޫ ރަށްކުރިއަރުވާ ކޮމިޓީގެ ފަރާތުން އެސްޓިމޭޓް އުސޫލުން ބަޔަކާއި ހަވާލުކޮށްގެން ގައްދޫ ރަށްވެހިގޭގެ ވަށާފާރު އުސްކުރުމުގެ މަސައްކަތް ފައްޓައިފިއެވެ.

31 ދުވަހުގެ ތެރޭގައި ނިންމާގޮތަށް ގައްދޫ ސަރިންދާގެ އަހުމަދު ރަޝީދާއި ހަވާލުކޮށްފައިވާ  މިމަސައްކަތުގެ ޖުމްލަ އަގަކީ 79600/- އެވެ. މިގޮތުން އުސްކުރުމަށް ހަމަޖެހިފައިވާ ފާރުތަކަކީ ރަށްވެހިގޭގެ ހުޅަނގު ފާރާއި ދެކުނު ފަރާތުގެ ފާރުކަމަށްވެއެވެ. ހުޅަނގުމަތީފާރުގެ ބޮޑުބައެއް ކްންކްރީޓް ފައުންޑޭޝަން އަޅައިގެން އެޅިގަލުން ރާނާ ގޮތަށް ހަމަޖެހިފައިވީނަމަވެސް ދެކުނުފަރާތުގެ ފާރު އުސްކުރަން ހަމަޖެހިފައިވަނީ އިހުގެ ފާރުގެމަތީ އެޅިގަލުން ރާނައިގެންނެވެ. 

ތަފާތު ސަބަބު ތަކާއި ހުރެ މިމަސައްކަތަށް ހުށަހެޅި އެސްޓިމޭޓްތައް ދެ ފަހަރެއްގެ މަތިން ކެންސަލްކޮށްފައިވާ ކަމަށް މިސައިޓަށް މައުލޫމާތު ލިބިފައި ވެއެވެ.

ގައްދޫ ރަށްވެހިގެ އިމާރާތް ކުރުމަށްޓަކައި ކުރީގެ އެޓޮލްސް މިނިސްޓަރ އަބުދުﷲ ހަމީދު އެޅުއްވި ބިންގާ އެމަސައްކަތް ނުފެށިގިނަ ދުވަސްތަކެއް ވަމުން ދިޔުމުގެ ސަބަބުން ވަނީ މުޅިން ފެހި ޖަހާ ފީވެފައެވެ. އަދި ސަރުކާރުން މިމަސައްކަތް ކުރާގޮތަށް ހަމަޖެހިފައިނުވާކަން ޔަގީންވުމުން ގައްދޫ ރަށްކުރިއަރުވާކޮމިޓީން ވަނީ ކުރީގެ ބާ އިމާރާތް އަލުން މަރާމާތު ކޮށްފައެވެ.