ރިޔާސީ އިންތިޚާބަށްފަހު ރައްޔިތުންގެ މަޖިލިހުގެ އިންތިޚާބަށް ވާދަކުރައްވާ ބައެއް ކެންޑިޑޭޓުން ހަރަކާތްތެރިވާން ފަށައިފި.

ގައްދޫ ހިމެނޭ ދާއިރާއަށް ކުރިމަތި ލައްވާނެކަން މިހާރުވެސް ގދ. ގެ މެމްބަރަކަށް ހުންނެވި ޒާހިރު އާދަމް ވަނީ އިއުލާންކުރައްވާފައި.

ރިޔާސީ އިންތިޚާބްގެ ފޯރިގަދަ ކެމްޕޭނަށް ފަހު ރައްޔިތުންގެ މަޖްލީހަށް ކުރިމަތިލެއްވުމަށް ގަސްދު ކުރައްވާ ބައެއް ކެންޑިޑޭޓުންގެ ކެމްޕެއިން މަސައްކަތް ފެށިގެން ކުރިޔަށް އެބަދާކަމަށް ޚަބަރު ލިބިއްޖެއެވެ.

މިގޮތުން ކުރިޔަށް އޮތް 5 އަހަރުގެ މުއްދަތަށް އިންތިޚާބްކުރާ ރައްޔިތުންގެ މަޖިލިހަށް ކުރިމަތި ލައްވާނެކަން މިހާރުވެސް ގދ. ގެ އެއް މެމްބަރެއްގެ ގޮތުގައި ހުންނެވި އަލްފާޟިލް ޒާހިރު އާދަމް ވަނީ އިއުލާން ކުރައްވާފައެވެ. އަދި ހަމަ އެއާއެކު ޑރ. ހަސަން ސައީދުގެ ފަރާތުން ގައްދޫ ރޯސްމާގެ އަބްދުﷲ އަމީން ވެސް ވަނީ ގައްދޫ ހިމެނޭ ޒޯނަށް ކުރިމަތި ލައްވަން ގަސްދު ކުރައްވާ ކަން ހާމަކޮށްފައެވެ. މިވަގުތު އޭނާ ގެންދަވަނީ އާންމުންނަށް ތައާރަފް ވެލުމުގެ ގޮތުން ގައްދޫގައި ހަރަކާތްތެރި ވަމުންނެވެ.

މިކެންޑިޑޭޓުންގެ އިތުރުން މަޖިލަށް ކުރިމަތި ލައްވާނެ ކަމަށް ވާހަކަ ދެކެވޭ ބައެއް ބޭފުޅުންނަކީ ގައްދޫ މާގަސްދޮށުގެ އަލްފާޟިލް މުހައްމަދު ޒާހިރާއި، ގައްދޫ ބަގީޗާގެ ރަޝީދާއި، ގައްދޫ ސީނިކް އިމްތިޔާޒް އާއި، ގައްދޫ ޖަހާ މުގުރިގޭ ރާޝިދު އަދި މުންނާރު ދޮށުގެ މުހައްމަދު ނިޒާމް އެވެ. އެހެންނަމަވެސް މިކެންޑިޑޭޓުން އިންތިޚާބްގައި ވާދަކުރައްވާނެ ކަމެއް އަދި މުޅިން ޔަގީންވެފައެއް ނުވެއެވެ.

ރިޔާސީ ފޯރިގަދަ އިންތިޚާބަށްފަހު ރައްޔިތުންގެ މަޖިލިސްގެ އިންތިޚާބްވެސް ވެގެންދާނީ  އެހާމެ  ވާދަވެރި އަދި ފޯރިގަދަ އިންތިޚާބެއް ކަމަށް ބެލެވެއެވެ. މިފަހަރުގެ އިންތިޚާބްގައި ވެސް ރައްޔިތުންގެ ވޯޓް ގަތުމަށް ބައެއް ކެންޑިޑޭޓުން މަސައްކަތް ކުރާނެކަމަށް ވަރަށް ބޮޑަށް ބެލެވެއެވެ. އެހެންކަމުން މިކަމަށްޓަކައި މީހުން ހޭލުންތެރި ކުރުވުމުގެ މަސައްކަތް ދުރާލާ ފެއްޓުމަކީ ވަރަށް މުހިއްމު ކަމެކެވެ.