ގައްދޫގައި ކްރައިމް ޕްރިވެންޝަން ކޮމިޓީއެއް އިފްތިތާހް ކޮށްފި.

ފައިލްފޮޓޯ: ގައްދޫ ގައި ތިބޭ ފުލުހުންގެ ބަޔަކު ބަނދަރު ސަރަހައްދުގައި ހަރަކާތްތެރިވަނީ.

ކްރައިމް ޕްރިވެންޝަން ކޮމިޓީގެ މަގްސަދަކީ ފުލުހުންނާއި ގުޅިގެން ކުށްމަދުކުރުމަށް އެހީވުން.

މުޖްތަމައުގައި ހިނގަމުންދާ ކުށްތައްމަދުކުރުމުގެ ގޮތުން ފުލުހުންނާއި ގުޅިގެން މަސައްކަތް ކުރުމަށްޓަކައި ގައްދޫގައި ކްރައިމް ޕްރިވެންޝަން ކޮމިޓީއެއް އިފްތިތާހް ކޮށްފިއެވެ. މިކޮމިޓީ އިފްތިތާހް ކޮށްފައިވަނީ މިދިޔަ އާދީއްތަދުވަހު 09:00 ގައި ގދ. އަތޮޅުމަދަރުސާގެ ހޯލްގައި އޮތް ރަސްމިއްޔާތެއްގައި ގައްދޫ ކައުންސިލަރ އަލްފާޟިލް އަބްދުލް އަޒީޒް މުހައްމަދެވެ.

މިކޮމިޓީން ފުލުހުންނާއި ގުޅިގެން ކުރުމަށްހަމަޖެހިފައިވާ މަސައްކަތްތަކުގެ ތެރޭގައި ހިމެނެނީ ރައްޔިތުން ހޭލުންތެރިކުރުވުމުގެ ގޮތުން ވަރކްޝޮޕް، ސެމިނަރ ފަދަ ކަންކަން ބޭއްވުމާއި،  ތަފާތު ކުށްތަކާއި ބެހޭގޮތުން ސްކޫލްކުދިން ހޭލުންތެރުކުރުވުމުގެ ޕްރޮގްރާމްހިންގުމާއި، ކުށްތަކާއި ބެހޭގޮތުން ދީނީ ނަޒަރަކުން ބަލައި ނަސޭހަތް ދިނުމާއި ދަރިން ހެޔޮގޮތުގައި ތަރުބިއްޔަތު ކުރުމަށް މައިންބަފައިން ހޭލުންތެރިކުރުވުމުގެ ޕްރޮގްރާމް ތައް ހިންގުން ފަދަ ކަންކަމެވެ.

މިއީ މޯލްޑިވްސް ޕޮލިސް ސަރވިސްގެ ފަރާތުން ކުރިޔަށް ގެންދާ "އެންމެންގުޅިގެން ކުށްމަދުކުރެވޭނެ" މި ޝިއާރުގެ ދަށުން ކުރިއަށްދާ ޕްރޮގްރާމެއްކަމަށް މައުލޫމާތު ލިބިފައިވެއެވެ. 

މިގޮތުން ގައްދޫގައި އުފެދުނު ކޮމިޓީގެ ޗެއަރޕަރސަނަކަށް ގައްދޫ އޭޝިއާ އިލްހާމް ރަޝީދު ހޮވިފައިވާއިރު ވައިސް ޗެއަރޕާސަން ކަމުގެ މަގާމަށް ހޮވިފައިވަނީ ގައްދޫ ވެލްކަމް އަލީ އުޒައިރެވެ. މީގެ އިތުރުން ކޮމިޓީގައި އިތުރު 10 މެމްބަރުން ހިމެނޭކަމަށް ޚަބަރުލިބިފައި ވެއެވެ. މިބޭފުޅުންނަކީ ބަހާރުގެ އަހުމަދު ފަހުމީއާއި ރަމްޒް އަހުމަދު ރަބީލް، އޯކިޑްވިލާ އަހުމަދު ފަޟީލް، އަލިވާގެ އާއިޝަތު ހަބީބާ، އަސަރީވެލި މުހައްމަދު ނާސިރު، ހުދުވެލި ހަސަން ވަހީދު، ބްލޫޑައިމަންޑް އަބްދުﷲ އާދިލް އަދި ފޫޅުމާގެ އަހުމަދު ސައިދެވެ.