ގައްދޫ އިން މީހަކު ގެއްލިގެން ހޯދައިފި

މިމީހާ ހޯދަން މަސައްކަތް ކުރަން އުޅެނިކޮށް އޭނާ ފަހުން ވަނީ ފެނިފައި.

އިއްޔެ އެކަނި މަސްހިފަންގޮސް އުޅުނު ގައްދޫ މީހަކު ގެއްލިގެން ހޯދައިފިއެވެ. އިއްޔެ މެންދުރުފަހުގެ ވަގުތެއްގައި މަސްހިފަން ގޮސްއުޅުނުމީހާ ހޯދަން ފެށީ ރޭ 09 ޖަހާކަންހާއިރުވެސް އޭނާ ރަށަށް އަނބުރާ ނައުމުގެ ސަބަބުންނެވެ. ގެއްލިގެން ހޯދިމީހަކީ ގައްދޫ ބާޑީގެ ޣަނީ ކަމަށްވެއެވެ.

ރެއަކީ ފުދޭވަރަކަށް ވިއްސާރަ ރެއަކަށްވެފައި އޭނާ ރަށަށް ނައުމުގެ ސަބަބުން އޭނާ ހޯދުމުގެ މަސައްކަތް ކުރުމަށްޓަކައި އާއިލާގެ ބައެއްމީހުންނާއި އެކު ގައްދޫގެ ގިނަ އަދަދެއްގެ ބަޔަކު ގައްދޫ އޮފީސް ކުރިމައްޗަށް އެއްވިކަމަށް ވެއެވެ.

މިމީހާ ހޯދުމަށް މަސައްކަތް ކުރިތާ ކުޑައިރުކޮޅެއްގެ ތެރޭގައިވަނީ އޭނާ ވަނީ ފެނިފައި ކަމަށްވެއެވެ. ޣަނީ ގައްދުއަށް އައުން ލަސްވެފައިވާކަމަށް މައުލޫމާތު ލިބިފައި ވަނީ މަސްހިފަންގޮސްއުޅެފައި އޭގެފަހުން މާވާރުލާއަށްގޮސް ދަނޑިކަނޑައިގެން އައުމުގެ ސަބަބުން ގައްދުއަށް އަނބުރާ އައުން ލަސްވުމުގެ ސަބަބުން ކަމަށްވެއެވެ.