އިމްތިޔާޒްގެ ކެމްޕޭން ޕޯސްޓަރ ނެރުމުގެ ރަސްމިއްޔާތު ބާއްވައިފި

ބައްދަލުވުމުގައި ގައްދޫ ކައުންސިލަރ އަބްދުލް އަޒީޒް ޕޯސްޓަރ ނެރެދެއްވަނީ

މިރަސްމިއްޔާތުގައި ޕޯސްޓަރ ނެރެދެއްވައިފައިވަނީ ގައްދޫ ކައުންސިލަރ އަބްދުލް އަޒީޒް

ގައްދޫ/ވާދޫ ދާއިރާއަށް އެމްޑީޕީގެ ފަރާތުން ކުރިމަތި ލައްވާފައިވާ ކެންޑިޑޭޓް މުހައްމަދު އިމްތިޔާޒްގެ ކެމްޕޭން ޕޯސްޓަރ ނެރެދެއްވުމުގެ ރަސްމިއްޔާތު ރޭ 09:00 ގައިގައްދޫ ޒަމާނީ އައްސޭރި ގޭގައި ބާއްވައިފިއެވެ. މި ރަސްމިއްޔާތުގައި ޕޯސްޓަރ ނެރެދެއްވާފައިވަނީ ގައްދޫ ކައުންސިލަރ އަލްފާޟިލް އަބްދުލް އަޒީޒް މުހައްމަދެވެ.

މިބައްދަލުވުމުގެ މަގްސަދަކީ ކެމްޕޭން ޕޯސްޓަރ ނެރެދެއްވުމުގެ އިތުރަށް އިމްތިޔާޒް ރައްޔިތުންގެ މަޖިލިސްގެ މެމްބަރުކަމަށް ކުރިމަތިލައްވާފައިވާތީވެ އެކަން އާއިލާގެ ގާތްބޭފުޅުންނާއިއެކު ހިއްސާކޮށްލުންކަމަށް އިމްތިޔާޒް  ބައްދަލުވުމުގައި ވިދާޅުވިއެވެ. 

މިޕޯސްޓަރުގައި އިމްތިޔާޒް މަޖިލިހަށް ހޮވިއްޖެނަމަ ގައްދޫ ދާއިރާގެ ރައްޔިތުންނަށްޓަކައި ކޮށްދެއްވާނެ 2 ކަމެއް ހިމަނާފައިވެއެވެ.  އެއީ ގައްދޫ އެއަރޕޯޓްގެ މަސައްކަތް ހަގީގަތަކަށް ހައްދަވައި ދެއްވުމާއި ގައްދުއާއި ވާދޫގެ ބަނދަރު ހެއްދެވުމުގެ މަސައްކަތް 5 އަހަރުގެ މުއްދަތުގެ ތެރޭގައި ކޮށްނިންމުމެވެ. އެމްޑީޕީ ގެ ފަރާތުން މަޖިލީހަށް ކުރިމަތިލައްވާފައިވާ ކޮންމެ ކެންޑިޑޭޓެއްގެ ޕޯސްޓަރުގައި ވެސް މިފަދަ ކޮންމެވެސް 2 ކަމެއް ހިމަނާފައިވާނެކަމަށް އޭނާ މިބައްދަލުވުމުގައި ވިދާޅުވިއެވެ.

 އިތުރަށް ބައްދަލުވުމުގައި ވާހަކަދައްކަވަމުން އޭނާ ވިދާޅުވިގޮތުގައި މަޖިލިހަށް އޭނާ ހޮވިއްޖެނަމަ ރައްޔިތުންގެ ތަރައްގީއަށްޓަކައި ކުރަންޖެހޭ ކަންތައްތައް ކުރުމުގެ މަގު އެހެންކެންޑިޑޭޓުންނަށްވުރެ އޭނާއަށް ފަސޭހަ ވުމުގެ ފުރުސަތު އެބައޮތެވެ. ސަބަބަކީ އޭނާ އަކީ މިހާރު ރާއްޖޭގައި ވެރިކަން ކުރާޕާޓީގެ ކެންޑިޑޭޓަށް ވުމުގެ ސަބަބުން ސަރުކާރާއި ގުޅިގެން ކަންތައްތައް ކުރުމުގެ މަގު ފަހިވެގެންދާނެތީއެވެ.

މިބައްދަލުވުމުގައި އިމްތިޔާޒްގެ އިތުރުން ގައްދޫ ކައުންސިލަރ އަބްދުލް އަޒީޒާއި ގައްދޫ ފަނޑުނުވާގެ އަހުމަދު އާތިފް ވާހަކަ ދެއްކެވިއެވެ. އަބުދުލް އަޒީޒްގެ ވާހަކަފުޅުގައި ވެރިކަން ކުރާޕާޓީއަށް މަޖިލިހުގެ އަޣްލަބިއްޔަތު ލިބިއްޖެނަމަ ލިބިގެންދާނެ ކުރިއެރުންތަކާއި ދޭތެރޭގައި ތަފްސީލްކޮށް އަލިއަޅުއްވާލެއްވިއެވެ.