ގައްދޫގައި ބޭންކެއްގެ ޚިދުމަތް ލިބޭނެ ގޮތްހައްދަވައިދެއްވުމަށްއެދި ރައީސަށް ދެންނެވި ދެންނެވުމަށް ސަރުކާރުން ޖަވާބު ދެއްވައިފި.

މިފަދަ މުހިއްމު ޚިދުމަތްތައް ލުއި ފަސޭހަގޮތެއްގައި ލިބިގަތުމުގެ މަގުފަހިކޮށްދެއްވުމަށް ރައްޔިތުން ދަނީ ތަކުރާރުކޮށް ސަރުކާރުގައި ދަންނަވަމުން.

29 ޑިސެމްބަރ 2008 ގައި ރައީސުލް ޖުމްހޫރިއްޔާ އަލްފާޟިލް މުހައްމަދު ނަޝީދު ގައްދުއަށް ވަޑައިގެން ގައްދޫގެ ރައްޔިތުންނާއި ބައްދަލުކުރެއްވުމުން ބެންކެއްގެ ޚިދުމަތް ގައްދުއަށް އަވަސް ފުރުސަތެއްގެ ތެރޭގައި ލިބޭނެ ގޮތް ހައްދަވާދެއްވުމަށް އެދި ރައްޔިތުން ރައީސް ނަޝީދަށް ދެންނެވި ދެންނެވުމަށް ސަރުކާރުން ޖަވާބު ދެއްވައިފިއެވެ.

އަތޮޅު އޮފީސް މެދުވެރިކޮށް ގައްދޫ އޮފީހަށް ފޮނުވާފައިވާ ސިޓީގައި ސަރުކާރުން ޖަވާބުދެއްވާފައިވަނީ މިކަމަކީ އަވަސް ފުރުސަތެއްގެ ތެރޭގައި ކުރެވިދާނެކަމެއްތޯ ބެއްލެވުމަށް ފިނޭންސް މިނިސްޓްރީގައި ދެންނެވުމުން އެމިނިސްޓްރީން ޖުމްލަ ގޮތެއްގައި އަންގަވާފައިވަނީ ބޭންކުގެ މާލީ ހާލަތު ރަނގަޅުވުމުން އަތޮޅުތަކުގައި އެ ޚިދުމަތް ފުޅާކުރައްވާނެ ވާހަކައެވެ.

ގައްދޫގެ ރައްޔިތުން ބޭސްފަރުވާ އަށާއި ބޭންކުގެ ޚިދުމަތް ފަދަ މުހިއްމު ޚިދުމަތްތައް ލިބިގަތުމަށްޓަކައި މިވަގުތު ދާންޖެހިފައިވަނީ 58.9 ކިލޯމީޓަރު ދުރުމިނުގައި ގދ. ތިނަދޫގައި ގާއިމްކޮށްފައިވާ މުއައްސަސާތަކަށެވެ. އެހެންކަމުން ޖީބުން ބޮޑެތި ޚަރަދުތައް ކޮށްގެން މިފަދަ ޚިދުމަތްތައް ހޯދަން ޖެހިފައި ވުމުގެ ސަބަބުން ގައްދޫ ރައްޔިތުންވަނީ ތަކުރާރުކޮށް މިފަދަ ކަންތައްތަކަށް ލުއިފާސޭހަގޮތްތަކެއް ހޯއްދަވައި ދެއްވުމަށްޓަކައި ރައްޔިތުންގެ މަޖިލީހުގެ މެމްބަރުން މެދުވެރިކޮށްގެންނާއި އަދި ސީދާ ރައްޔިތުންގެ ފަރާތުން ސަރުކާރުގެ އެކި ފަންތީގެ ވެރިންނަށް ދަންނަވަމުންނެވެ. އެހެންނަމަވެސް މިއަދާއި ހަމައަށް މިއިންކަމަކަށް އެދެވޭ ހައްލެއް ލިބިފައެއް ނުވެއެވެ. ގައްދޫ ހިމްނޭ ސަރަހައްދަކީ ހުވަދު އަތޮޅުގައި އެންމެ ގިނަ ރިސޯޓްތައް ހަދަމުންދާ ސަރަހައްދަށްވެފައި އަދި މަސްވެރިކަމާއި އެހެނިހެން އިގްތިސާދީ ގިނަ ކަންތައްތަކެއް ހިނގަމުންދާ ސަރަހައްދެއް ކަމުން ގައްދޫގައި ބޭންކެއްގެ ޚިދުމަތް ގާއިމް ކޮށްފިނަމަ އޭގެ ސަބަބުން ވަރަށް ބޮޑު ލުއި ފަސޭހަކަމެއް ލިބިގެން ދާނެއެވެ.