ގައްދޫ ފެހިކުރުމުގެ ގޮތުން ގަސްއިންދުމުގެ ޕްރޮގްރާމެއް ބާއްވައިފި

ގަސްއިންދުމުގެ ހަރަކާތުގައި ރައްޔިތުން ހަރަކާތްތެރިވަނީ

މި ޕްރޮގްރާމަށް ރައްޔިތުންގެ ވަރަށްބޮޑު ތަރުހީބެއް ލިބިގެންދިޔަ

ރަފްޓާ ޕްރޮޖެކްޓްގެ ދަށުން ކުރުމަށް ހަމަޖެހިފައިވާ ގައްދޫ ފެހިކުރުމުގެ ޕްރޮގްރާމް މިއަދު އިފްތިތާހް ކުރައްވައިފިއެވެ. ގައްދޫ ރައްޔިތުންގެ ވަރަށްބޮޑު ތަރުހީބަކާއި އެއްބާރުލެއްވުމެއް ލިބިގެންދިޔަ މިޕްރޮގްރާމް ފެށުނީ މިއަދު ހެނދުނު 07:00 ގައެވެ.

މިޕްރޮގްރާމް ކުރިއަށް ގެންގޮސްފައިވަނީ މައިގަނޑު 4 ގްރޫޕަކަށް ބަހައިލައިގެންނެވެ. މިގޮތުން ގްރޫޕްތައް ބަހާލައިފައިވާ ގޮތަކީ ރަށުގެ އުތުރުކޮޅުޒުވާނުންގެ ގްރޫޕަކާއި، ދެކޮނުކޮޅުގެ ޒުވާނުންގެ ގްރޫޕަކާއި، ރަށުގެ މުއައްސަސާތަކުގެ ގްރޫޕަކާއި، އަދި ގދ. އަތޮޅުމަދަރުސާގެ ގްރޫޕެއް ހިމެނޭ ގޮތަށެވެ. ސްކޫލްގެ ގްރޫޕް މަސައްކަތް ކުރިއަށް ގެންގޮސްފައިވަނީ އިތުރު 10 ގްރޫޕަކަށް އެގްރޫޕް ބަހާލައިގެންނެވެ.

މިމަސައްކަތަށް ބޭނުންވާ ކަޅުފަސްގެނައުމާއި ދަނޑިތައް ގެނައުމުގެ މަސައްކަތް ކޮށްފައިވަނީ ގައްދޫގެ ޒުވާނުން އިސްނަގައިގެން ވަރަށް ޖޯޝާއި ފޯރިއާއި އެކުގައެވެ. މިހަރަކާތުގައި ގައްދޫގެ ޒުވާނުން ދައްކައިދީފައިވަނީ މިފަހަށް އައިސް ޒުވާނުންގެ މެދުގައި ނުފެންނަފަދަ ފުރިހަމަ ބައިވެރިވުމަކާއި އެއްބާރުލުމެއްކަން ފާހަގަކޮށްލެވެއެވެ. އަދި މިއަދުގެ ގަސްއިންދުމުގެ ހަރަކާތުގައި ބައިވެރިވި ފަރާތްތަކަށް ބޭނުންވާ ކެއުމާއި ޖޫހުގެ ކަންތައްތައް އިންތިޒާމްކުރުމުގައި ވެސް ގައްދޫގެ އަންހެން ބޭފުޅުންދެއްވި އެއްބާރުލެއްވުން ފާހަގަކޮށްލެވެއެވެ.

ގަސްއިންދުމުގެ ޕްރޮގްރާމްގައި މިއަދު ގަސްތައް އިންދާފައިވަނީ ރަށުގެ އުތުރު ސަރަހައްދުގައެވެ. ދެކުނުގެ ސަރަހައްދުގައި ގަސްއިންދެވުމަށް ހަމަޖެހިފައިވަނީ އެސަރަހައްދުގައި ލުމަށް ހަމަޖެހިފައިވާ ރިވެޓްމަންޓްގެ މަސައްކަތް ނިމުމުން ކަމަށް މައުލޫމާތު ލިބިފައިވެއެވެ. މިގޮތަށް ނިންމާފައިވަނީ އެ ސަރަހައްދުގައި މިހާރު ގަސްތައް އިންދައިފިނަމަ ރިވެޓްމެންޓްގެ މަސައްކަތް ކުރިއަށް ގެންދާއިރު ގަސްތަކަށް ގެއްލުން ލިބިދާނެކަމަށް ވިސްނައިފައެވެ.

ގައްދޫގައި އިންދުމަށް ބޭނުންވާ ގަސްތައް މުޑުވައްކުރަނީ ގދ. ގަމުގައި ތައްޔާރުކޮށްފައިވާ ނާސަރީއެއްގައެވެ. މި ނާސަރީގައި ތަފާތު ވައްތަރު ވައްތަރުގެ ގަސްތައް މުޑުވައް ކޮށްފައިވެއެވެ. ގަސްއިންދުމުގެ މިފަދަ އިތުރު ޕްރޮގްރާމްތައް ކުރިއަށް އޮތް ދުވަސްތަކުގައި ކުރިއަށް ގެންދިއުމަށް ހަމަޖެހިފައިވާ ކަމަށް ރަފްޓާ ޕްރޮޖެކްޓް މެނޭޖަރ އަލްފާޟިލް އަބޫބަކުރު މުހައްމަދު މައުލޫމާތު ދެއްވެވިއެވެ.