ގައްދޫ ރަށްވެހިގެއަށް އިތުރުކުރާބައިގެ މަސައްކަތް ފަށައިފި

ގައްދޫ ރަށްވެހިގެ

އިމާރާތުގައި ކޮންފަރެންސް ހޯލެއްގެ އިތުރުން ތިންކޮޓަރި އިމާރާތްކުރުމަށް ހަމަޖެހިފައިވޭ.

ގައްދޫ ރަށްވެހިގޭގެ އިރުމަތީފަރާތުން އަލަށް ހެދުމަށް ހަމަޖެހިފައިވާ އިމާރާތުގެ މަސައްކަތް ފެށިގެން ކުރިއަށް އެބަދެއެވެ. މިއިމާރާތުގެ މަސައްކަތް އެއްކޮށް ނިމޭއިރު ކޮންފަރެންސް ހޯލެއްގެ އިތުރުން، އެޓޭޗްޑް ބާތްރޫމާއި އެކީ 3 ކޮޓަރި އިމާރާތްކުރާގޮތަށް ހަމަޖެހިފައިވެއެވެ. އެހެންނަމަވެސް މަސައްކަތުގެ މިފޭހުގައި ހެދުމަށް ހަމަޖެހިފައިވަނީ ފާޚާނާއެކީ 2 ކޮޓަރީގެ އިތުރުން ކޮންފަރެންސް ހޯލް ގެ ބައެއް މަސައްކަތްތައްކަމަށާއި މަސައްކަތުގެ 2 ވަނަ ފޭހުގައި ކޮންފަރެންސް ހޯލްގެ މަސައްކަތްތައް މުޅިން ނިންމައި އިމާރާތަށް އެއްކޮޓަރި އިތުރުކުރާގޮތަށް ހަމަޖެހިފައިވާ ކަމަށްވެސް މައުލޫމާތު ލިބިފައިވެއެވެ. މިއިމާރާތުގެ މަސައްކަތް އެއްކޮށް ނިމޭއިރު ގާތްގަނޑަކަށް އެގާރަލައްކަ ރުފިޔާ އިމާރާތަށް ޚަރަދުވާނެ ކަމަށް ލަފާކުރެވޭ ކަމުގައި ގައްދޫ އޮފީހުން މައުލޫމާތު ދެއްވެވިއެވެ.  

ގައްދޫ ރައްޔިތުންގެ މާލިއްޔާއިން ޚަރަދުކޮށްގެން ކުރަމުންދާ މިމަސައްކަތް ކޮންޓްރެކްޓްގެ އުސޫލުން 112 ދުވަހުގެ ތެރޭގައި ނިންމާގޮތަށް ހަވާލުކޮށްފައިވަނީ ވެލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑާއިއެވެ. ޖުމްލަ 3 ފަރާތަކުން ކުރިމަތިލާފައިވާ މިމަސައްކަތް ކުރުމަށް އެކުންފުނިން ހުށަހަޅާފައިވާ އަގަކީ 474174 (ހަތަރު ލައްކަ ހައްދިހަ ހަތަރުހާސް އެއްސަތޭކަ ހައްދިހަ ހަތަރު) ރުފިޔާއެވެ.

ގައްދޫ ރަށްވެހިގޭގައި ކުއްޔަށްދޭ 5 ކޮޓަރި މިހާރުވެސް ތައްޔާރުކޮށްފައިވާ ކަމަށާއި މި ދެއިމާރާތް ނިމުމުން ކުއްޔަށްދޭ ޖުމްލަ 8 ކޮޓަރި ރަށްވެހިގޭގައި ހުންނާނެކަމަށް މައުލޫމާތު ލިބިފައިވެއެވެ.