ގަމުން ވެލާކަތިލުމުގެ މައްސަލަ އަނެއްކާވެސް ކުރިމަތިވެއްޖެ

ފަހަކަށް އައިސް ގަމުން ގިނަ އަދަދެއްގެ ވެލާތަކެއް ކަތިލަމުން ގެންދާކަމަށްވޭ.

ގައްދޫ އާއި ޖެހިގެން އޮންނަ ގދ. ގަމަށް އަރާވެލާތައް ބަޔަކު ކަތިލަމުންދާކަމަށް ޚަބަރު ލިބިއްޖެއެވެ. މިގޮތުން ގަމަށް އަރާ ގިނައަދަދެއްގެ ވެލާތައް އޭތީގެ މަހާއި ވެލާބިހުގެ ބޭނުމުގައި ކަތިލާ، ވެލާ މަހާއި ވެލާބިސް ހުވަދު އަތޮޅުގެ ބައެއް ރަށްރަށަށް ފޮނުވަމުންދާކަމަށް މައުލޫމާތު ލިބިފައިވެއެވެ. 

ގަމަށް އަރާވެލާތަކުގެ ބިސް ނެގުމާއި ވެލާކަހަނބުތަކަށް ގެއްލުން ދިނުމަކީ ސަރުކާރުން މަނާކޮށްފައިވާ ކަމެއް ނަމަވެސް ކައިރި ރަށްރަށުންނާއި ގައްދޫގެ ރައްޔިތުންގެ ތެރެއިން ބަޔަކު މިކަން ހުއްޓުމެއްނެތި ކުރަމުންދިޔުމަކީ ހިތާމަހުރި ކަމެކެވެ. މިކަމަކީ ހުވަދު އަތޮޅަށް ޓޫރިޒަމް ތައާރަފްވަމުން އަންނައިރު މިކަމުގެ ސަބަބުން ނުބައި އަސަރުތަކެއް ކުރިމަތިވާނެކަމެކެވެ.

އެހެންކަމުން ކޮންމެވެސް ބަޔަކު އިސްނަގައިގެން މިފަދަ ވިޔާނުދާ އަމަލްތައް ހުއްޓުވަން މަސައްކަތް ކުރުމަކީ މިއަދާއި މުސްތަގްބަލްގެ ޖީލަށްޓަކައި ކޮންމެހެން ކުރަން ޖެހޭނެ ކަމެކެވެ. މިފަދަ ކަންކަން ހުއްޓުވުމުގައި ގަވާއިދާއި ގާނޫން ހިމާޔަތް ކުރަން ތިބި ފަރާތްތަކާއި ޖުމްލަ ގޮތެއްގައި މުޅި މުޖްތަމައުގެ ޒިންމާތަކެއް ވާކަން ޔަގީނެވެ.

ތަންކޮޅެއް ކުރިން ގައްދޫ ރަށްކުރިއަރުވާ ކޮމިޓީގެ ފަރާތުން ގަން ބެލެހެއްޓުމަށް މީހަކު ބަހައްޓާފައި ވީނަމަވެސް މިހާރު ގަމުގައި އެއްވެސް މީހެއް ނުހުރެއެވެ.