ސްޓެލްކޯއިން ގައްދޫގެ ފެންޕްލާންޓުގެ ކަރަންޓް ކަނޑާލައިފި

ރެޑްކްރޮސްގެ ފަރާތުން ގައްދޫގައި ބަހައްޓާފައިވާ ފެންޕްލާންޓް

ކަރަންޓް ބިލްތަކަށް ފައިސާ ނުދައްކާތާ 9 މަސް ވެއްޖެ.

އޮސްޓްރޭލިއަން ރެޑްކްރޮސްގެ ފަރާތުން ގައްދޫގައި ބަހައްޓާފައި ހުރި ފެންޕްލާންޓުން ސްޓެލްކޯގެ ބިލްތަކަށް ފައިސާނުދެއްކުމުން އެފަރާތުން މިއަދު އެތަނުން ކަރަންޓް ކަނޑާލައިފިއެވެ.

ޚަބަރު ލިބޭގޮތުގައި 9 މަހުގެ ބިލްތަކަށް ގާތްގަނޑަކަށް 34،000 އެއްހާ ރުފިޔާ އަރާފައިވެއެވެ. ގައްދޫ ކަތީބު އިސްމާއިލް ޝަމީމް ވިދާޅުވީ ގައްދޫގެ ފެންޕްލާންޓް ހިންގާ ބަލަހައްޓާ ގޮތަށް ހަމަޖެހިފައި އޮތީ ރައްޔިތުން ކަމަށް ވުމުގެ ސަބަބުން މިބިލް ތަކަށް ފައިސާ ދެއްކުމުގެ ކަންތައްތައް ހަމަޖައްސަން ޖެހެނީ އެފަރާތުން ކަމަށެވެ. މިގޮތުން ރެޑްކްރޮސް އާއި ގައްދޫ ރަށްކުރިއަރުވާ ކޮމިޓީއާއި ދެމެދު ކުރެވިފައިވާ އެއްބަސްވުމުގައި ޕްލާންޓްހިންގުމާއި ޕްލާންޓްގެ ޑިސްޓްރިބިއުޝަން ސިސްޓަމްހިންގާ ބެލެހެއްޓުން ގައްދޫ ރަށްކުރިއަރުވާ ކޮމިޓީގެ ފަރާތުން ބަލަހައްޓާ ގޮތަށް އެއްބަސް ވެފައި ވެއެވެ. މި އެއްބަސް ވުމުގައި ކޮމިޓީގެ ފަރާތުން ސޮއިކޮށްފައިވަނީ އިލްހާމް ރަޝީދެވެ.

އޭނާ އިތުރަށް ވިދާޅުވިގޮތުގައި މިއެއްބަސް ވުމުގައި ޕްލާންޓް ހިންގުމަށްޓަކައި ރަށްކުރިއަރުވާ ކޮމިޓީން ދެ ޓެކްނީޝަނުންވެސް ދޭގޮތަށް އެއްބަސް ވެފައި ވެއެވެ. ނަމަވެސް ކޮމިޓީން ބަޔަކު ހަމަނުޖައްސައި ޕްލާންޓް ހިންގާނޭ ބަޔަކު ނެތުމުގެ ސަބަބުން ރަށުއޮފީސް ގެ ފަރާތުން ސަރުކާރުގެ މިނިސްޓްރީ ތަކާއި ވާހަކަ ދައްކައިގެން ވަނީ ޕްލާންޓް ބެލެހެއްޓުމަށް ޓަކައި ވަނީ މުވައްޒަފެއް ހަމަ ޖައްސަވާފައެވެ.

މިޕްލާންޓް ހިންގުމަށްޓަކައި ގޮތްތަކެއް ރޭވުމަށްޓަކައި "ފެން ކޮމިޓީ" ގެ ނަމުގައި މީގެ ކުރިން ވަނީ ކޮމިޓީއެއްވެސް އުފައްދަވާފައެވެ. މި ކޮމިޓީ އެކުލެވިގެންވަނީ މައިގަނޑު ގޮތެއްގައި މަސްވެރިންގެ މައްޗަށެވެ. ސަބަބަކީ ޕްލާންޓުން ގިނައިން ފެން ބޭނުން ކުރަނީ މަސްވެރިން ކަމަށް ވުމުގެ ސަބަބުން މިކަމަށް އެންމެ އެކަށޭނެ ބަޔަކީ އެފަރާތްތައް ހިމެނޭ ގޮތެއްގައި އެކުލެވިފައިވާ ކޮމިޓީ އެއްކަމުގައި ފެންނާތީއެވެ. މިގޮތުން މިކޮމިޓީން ވަނީ ތަން ކޮޅެއް ކުރިން ކޮންމެ ދޯންޏަކުން 400 ރުފިޔާ ނަގާގޮތަށް ނިންމާފައެވެ. ނަމަވެސް ބައެއް ދޯނިފަހަރުން ފައިސާ ނުދައްކާތީ މިކަންވަނީ މިގޮތަށް ކުރިޔަށް ނުގޮސްފައެވެ.

ޕްލާންޓް ހިންގުމަށްޓަކައި މިނިސްޓްރީގެ ފަރާތުން އެކުލަވާލައިފައިވާ ގަވާއިދުގައި ފެނުގެ ކޮލިޓީ ހުންނަން ވާނީ ޑަބްލިއު އެޗްއޯ ގަބޫލް ކުރާ މިންގަނޑެއް ގޮތުގައި ބަޔާންކޮށްފައިވެއެވެ. އަދި މީގެ އިތުރުން ޕްލާންޓްގައި ކެޕޭސިޓީ ހުރި ވަރަކަށް ގޭގެ އަށް ފެންހޮޅި ގުޅާދޭންޖެހޭނެ ކަމަށް ވެސް ލިޔެފައިވެއެވެ. ނަމަވެސް ފެނުގެ ކޮލިޓީ ޓެސްޓް ކުރުމަށް ބޭނުންވާ އިކުއިޕްމެންޓެއް ލިބިފައި ނުވާ ކަމުގައި މިސައިޓްގެ ފަރާތުން ޕްލާންޓް ހިންގުމާއި ހަވާލުވެ ހުންނެވި އަލްފާޟިލް ޒާހިރު އުސްމާނާ އި ސުވާލު ކޮށްލުމުން ވިދާޅުވެފައިވެއެވެ. އަދި މިހާތަނަށް އެއްވެސް އާންމު ގެއަކަށް ފެންހޮޅި ގުޅާދެވިފައެއްވެސް ނުވެއެވެ. ނަމަވެސް ގައްދޫ އަތޮޅުމަދަރުސާ އަށާއި ގައްދޫ ރަށްވެހިގެ އަށް ފެންހޮޅި ގުޅާދެވިފައިވާ ކަމަށް ޒާހިރު އުސްމާން ވިދާޅުވިއެވެ. ޕްލާންޓުން ކަރަންޓް ކަނޑާލިއިރުގައި ވެސް ޕްލާންޓްވަނީ ޓެކްނިކަލް މައްސަލައެއް ދިމާވުމުގެ ސަބަބުން ޚިދުމަތް މެދުކެނޑިފައެވެ. ރެޑްކްރޮސްގެ ފަރާތުން ބެހެއްޓި މިޕްލާންޓަކީ ވާރޭނުވެހި ފެނަށް ދަތިވެއްޖެ ހާލަތެއްގައި އޮޕަރޭޓް ކުރާގޮތަށް ބެހައްޓާފައިވާ ޕްލާންޓެއްކަމަށް މައުލޫމާތު ލިބިފައިވެއެވެ.

މިމައްސަލާގައި ސްޓެލްކޯއާއި އެނަރޖީ މިނިސްޓްރީ ގެ ބަހެއް ހޯދާލުމަށްޓަކައި ސައިޓުގެ ފަރާތުން ކުރިމަސައްކަތް ސަރުކާރުގެ ރަސްމީ ގަޑި ނިމުމުގެ ސަބަބުން ވަނީ ކާމިޔާބު ވާގޮތްނުވެފައެވެ.