ކޮންމެ ކަމެއްވެސް ގައްދޫ ރައްޔިތުންނަށް ކޮށްދެވޭނީ މުޒާހަރާ އާއި އާދެސްދެންނެވެމުންތޯއެވެ.
ގައްދޫގެ އުމްރާނީ ތަރައްގީ އަށްޓަކައި ސަރުކާރުން މިހާތަނަށް މާކަ ގިނަ ކަންތައް ތަކެއް ކޮށްދީފައި ނުވިކަމުގައިވިޔަސް، ކޮށްދީފައިވާ މަދު ކަމެއް އޮތްނަމަ އޭގެތެރެއިން ގިނަކަންތައް ކޮށްދީފައިވަނީ ރައްޔިތުންގެ މުޒާހަރާއާއި ފިއްތުން ތަކުގެ ސަބަބުންނެވެ.
ގައްދޫގައި ބިންފުރި ގެދޮރު އާބާދު ކުރުމަށް ބިންނެތިގެން އުޅުނުއިރު އެންމެ ފުރަތަމަ ސަރުކާރުން ބިންހިއްކެވުމަށް ނިންމާފައިވަނީ ދިރިއުޅުމަށްޓަކައި ގޯތި ބޭނުންވާ ފަރާތްތަކަށް ބިންދެވޭ ވަރަށްވުރެވެސް ކުޑަސަރަހައްދެކެވެ. އެހެންނަމަވެސް މިކަމާއި ރައްޔިތުން ނުރުހުންވެ ކުރެވުނު މުޒާހަރާ ތަކަށް ފަހު ގައްދޫގެ ބިން މިހާރު އޮތް ސައިޒަށްވަނީ ބޮޑުކޮށްދީފައެވެ.
ގައްދޫ އެއަރޕޯރޓް ކަންތައް ވެސް ދިޔައީ ހަމަ މިކަހަލަ ގޮތަކަށެވެ. އެންމެ ފުރަތަމަ ގއ. ދިޔަދޫގައި އެއަރޕޯރޓް އެޅުމަށް އިއުލާންކުރުމަށްފަހު މިއެއަރޕޯރޓް ބަދަލު ކުރެއްވީ ގއ. ވިލިނގިލީގެ ކައިރީގައި އޮންނަ ދިގުރަށަށެވެ. މިހެން ކަންތައް ދިމާވުމުން އަނެއްކާވެސް ގައްދު އާއި ގައްދޫގެ ކައިރި ރަށްރަށުގެ ރައްޔިތުންގެ ފަރާތުން ކުރެއްވި ބުރަ މަސައްކަތްތަކެއްގެ ސަބަބުން ގދ.މާވެއްދޫ ގައި އެއަރޕޯރޓެއް ހެދުމަށް ހަމަޖެހިގެންދިޔައެވެ. ސަރުކާރުން ނިންމަވާ މިފަދަ ނިންމެވުންތައް ވާންޖެހޭނީ ވަރަށްބޮޑަށް ވިސްނެވުމަށްފަހު އާންމު މަސްލަހަތާއި ތައާރަޒް ނުވާނެ ގޮތެއްގެ މަތިން ނިންމަވާ ނިންމެވުން ތަކަށެވެ.
ގައްދު އަކީވެސް ރާއްޖޭގެ ރަށްތަކަށް ބަލާއިރު އާބާދީ ގޮތުން ނިސްބަތުން ބޮޑު ރަށެކެވެ. އެހެންކަމަށްވީއިރު އާބާދީ ގޮތުން ގައްދުއާއި އެއްވަރު ނުވަތަ އެއަށްވުރެ މަދު އާބާދީ އެއް އޮތް ރަށްތަކަށްތަރައްގީ ގައި އިސްކަންދޭއިރު ގައްދޫގެ ތަރައްގީ އަށް ޓަކައި މިހާތަނަށް ސަރުކާރުން ކޮށްދީފައިވާ މާގިނަ ކަންތައްތަކެއް ފެންނާކަށް ނެތެވެ. ކުރީގައި ގައްދޫގެ ބިމުގެ ޖާގަ ނެތް ކަމުގައި ވިޔަސް ހަމަ ގައިމުވެސް ގައްދޫ އިން ނަރުދަމާގެ ނިޒާމް ކެންސަލް ކުރި އިރު ގައްދޫގައި ބިން އޮތެވެ.
އެހެންކްމުން މިމަސައްކަތް ދާންދުއާއި ވިލިނގިއްޔާ އެކު ފެއްޓުމަށްޓަކައި ކުރަންޖެހޭ ހުރިހާ ސަރވޭ ތަކެއް ނިމި މަސައްކަތް ފެއްޓުމާއި ހަމައަށް ދިޔުމުން އެއްވެސް މަގުބޫލު އުޒުރެއް ނެތި ފަހު ވަގުތުގައި މިލިސްޓުން ގައްދޫ އުނި ކުރުމަކީ އެއްގޮތަކަށްވެސް ގަބޫލުކުރެވޭނެ ކަމެއް ނޫނެވެ. ނަރުދަމާ ނިޒާމް ގާއިމް ކުރާލިސްޓުން ގައްދޫ އުނިކުރުމަށްފަހު ގައްދޫގެ މަސައްކަތަށް ބޭނުންވާ ފައިސާއެއް އަދި މިހާތަނަށް ސަރުކާރަށް ލިބޭ ގޮތް ނުވެފައި ވިޔަސް އިހަކަށް ދުވަހު ތިނަދޫގެ ނަރުދަމާގެ މަސައްކަތް ކުރުމަށް ސަރުކާރުން ވަނީ ފަންޑް ހޯދާފައެވެ. އެހެންކަމުންމިގޮތަށް ސަރުކާރުން ކަންތައް ކުރުމަކީ ގައްދުގެ ރައްޔިތުންނާއި ދޭތެރޭގައި ކަނޑައެޅިގެން ކުރެވޭ ބޭއިންސާފެއް ކަމުގައި ނޫނީ ވާނެތޯއެވެ. މިހާރު ކަންތައް ވީގޮތުން ގައްދޫގެ ނަރުދަމާގެ މަސައްކަތް ކެންސަލްކުރީ މިހާތަނަށް ތިނަދޫގައި ރަނގަޅު ނަރުދަމާ ނިޒާމެއް ނިޒާމް ގާއިމްވެފައި ނެތުމުގެ ސަބަބުން އެރަށަށްވުރެ ކުރިން ގައްދޫގައި ނަރުދަމާގެ ނިޒާމް ގާއިމްކުރެއްވުމަށް ސަރުކާރުން ބޭނުންނުވާތީ ކަމަށް ބެލެވޭނެ ޖާގަ އެބައޮތެވެ.
ގައްދޫ އަކީ ސުނާމީ ގައި ފެންތަޣައްޔަރުވުމުގެ ސަބަބުން އިންތިހާ އަށް ފެނުގެ މައްސަލަ ދިމާވެފައިވާ ރަށެކެވެ. އެހެންކަމުން މިފަދަ ރަށެއް އެކަހެރި ކުރުމަށްފަހު އެހެންރަށްތަކަށް ސަރުކާރުން އިސްކަން ދެއްވުމަކީ ގައްދޫގެ ރައްޔިތުންގެ ހިތުގައި ރުޅިވެރިކަމާއި ހިތްހަމަ ނުޖެހުން އުފެދޭނެ މައްސަލަ އެއްކަން ޔަގީނެވެ. ސަރުކާރެއް ވާންވާނީ ރައްޔިތުންނަށް ހަމަހަމަ ކަމާއި އިންސާފްވެރި ގޮތެއްގައި ކަންތައްތައް ކޮށްދޭން ޖެހޭ ބަޔަކަށެވެ. ވީމާ ގައްދޫ ރައްޔިތުން ސަރުކާރަށް މިގޮވައިލަނީ މިފަދަ ކަންތައްތަކުގައި ހަމަހަމަ ގޮތެއްގައި ކަންތައް ކުރުމަށާއި ވަކި ބަޔަކަށް މޮޅު ގޮތް ހޯދައި ވަކި ބަޔެއް އެއްފަރާތް ނުކުރުމަށެވެ.
ރަށްޓެއްސަކަށް އީމެއިލް ކުރުމަށް
ޕްރިންޓް ކުރުމަށް
ހަމަ އެކަނި ޓެކްސްޓް
ކޮމެންޓްސް (9 ލިބިއްޖެ):
ކޮމެންޓްސް ފުނުއްވާ