ކުދިންގެ އަޚްލާގީ މިންގަނޑު ހިފެހެއްޓުމުގައި ބެލެނެވެރިންގެ ސަމާލުކަން ވަރަށްބޮޑަށް އިތުރުކުރަން އެބަޖެހެއެވެ.

ގައްދޫގެ ކުޑަކުޑަކުދިން ކޮޅެއް- މިކުދިންނަކީ ގައްދޫގެ މުސްތަގްބަލް އުޖާލާ ކޮށްދޭން ތިބި ކުދިން

ޒުވާނުންގެ އަޚްލާގު ދަނީ ދުވަހެއް ދުވަހަކަށް ގޯސްވަމުން.

މައިންބަފައިން ނުވަތަ ބެލެނެވެރިއެއްގެ މަސްއޫލިއްޔަތަކީ އޭގައި ވަރަށް ބޮޑު ޒިންމާ ތަކަކާއި ވަރަށް ބޮޑު ގޮންޖެހުން ތަކެއް އެކުލެވޭ ކަމެކެވެ. ފުރާވަރަށް އަރައިގެން އަންނަ ކުދިން ތަކުގެ ފަރާތުން ކުރިމަތިވާ މައްސަލަތައް ހައްލު ކުރުމަކީ މައިންބަފައިންނަށް މިއަދު ކުރިމަތިވެފައިވާ ވަރަށް ދަތި، އުނދަގޫ މައްސަލައެކެވެ. މިފަދަ މައްސަލަތައް ތަހައްމަލް ކުރަންޖެހިފައިވާ ބެލެނެވެރިން އެމީހުންގެ ދަރިންނަކީ ޒިންމާދާރު ކިޔަމަންތެރި، އަދި މުޖްތަމައު ބަލައިގަންނަފަދަ ސިފަތަކެއް ލިބިފައިވާ ކުދިންތަކަކަށް ބަދަލުވާ ދުވަހެއްގެ އިންތިޒާރުގައި ކެތްތެރިކަމެއްނެތި ދުވަސްތައް ގުނަމުން ގެންދެއެވެ.

ޒަމާން ބަދަލުވެ، ޓެކްނޮލޮޖީގެ ރޮނގުން ލިބިފައިވާ ކުރިއެރުން ތަކުގެ ސަބަބުން ކުދިންނަށް ކުރާނޭދެވޭ އަސަރުތައް ވެސް ދަނީ ދުވަހެއް ދުވަހަކަށް އިތުރުވަމުންނެވެ. ކުރީގެ ޖީލްތަކާއި ޚިލާފަށް އަދުގެ ކުދިންނަށް ތަޖްރިބާ ކުރަން ޖެހިފައިވާ ކަންތައްތައް ތަފާތެވެ. މީގެ ތެރޭގައި  އޮންލައިންގެ ޒަރީއާއިން ބައްދަލުވާ މީހުންގެ ފަރާތުން ދިމާވާ ކަންތައް ތަކާއި، ކުދިންނާއި ނުގުޅޭ ބަރަހަނާ ވެބްސައިޓްތަކާއި، ބަދުއަޚްލާގީ މަންޒަރު ދައްކައިދޭ ވީޑިއޯތައް ކުރީގެ ޖީލްތައް ތަޖްރިބާ ކުރަން ޖެހިފައެއް ނުވެއެވެ. އަދި މަސްތުވާ ތަކެތީގެ މައްސަލަވެސް މިވަނީ ކުރީގެ ޖީލްތައް ތަޖްރިބާ ކުރަންޖެހިފައިނުވާ  ސީރިއަސް މައްސަލައެއް ކަމަށް ވެފައެވެ. އެހެންކަމުން މިފަދަ ކަންތައްތަކަކީ ކުދިންގެ ވިސްނުމަށާއި އަޚްލާގަށް ބޮޑެތި ބަދަލުތަކެއް އައުމަށް މެދުވެރިވެފައިވާ ކަންތައްތަކެވެ.

ކުދިން އަބަދުވެސް މަސައްކަތް ކުރަމުން ދަނީ އާ ކަންތައްތައް ތަޖުރިބާ ކުރުމަށެވެ. އެކުދިންގެ މިނިވަންކަން ވީހާވެސް ބޮޑަކަށް ފުޅާކުރެވޭތޯއެވެ. އެކުދިންނަށް ހުއްދަކުރެވިފައިވާ ދާއިރާ ވީހާވެސް ފުޅާކުރެވޭތޯއެވެ. އެހެންކަމުން މިކަމާއި ދޭތެރޭގައި ވިސްނުން ބަހައްޓަކައިގެން ކުދިންގެ އަޚްލާގް އެދެވޭ މިންގަނޑެއްގައި ހިފެހެއްޓުމަށްޓަކައި ވިސްނުންތެރި ފިޔަވަޅުތައް އަޅަން ޖެހެއެވެ. މިގޮތުން އަޅާފިޔަވަޅު ތަކަކީ ވީހާވެސް އިންސާފްވެރި ކުދިންގެ ދޭތެރޭގައި ތަފާތު ކުރުމެއްނެތް ހަރުދަނާ ފިޔަވަޅު ތަކެއް ކަމަށް ވާންޖެހެއެވެ.

ކުދިންތަރުބިއްޔަތު ކުރުމުގައި ގެންގުޅެންޖެހޭ އާންމު އުސޫލުތަކެއް ކަނޑައެޅުން ވަރަށްމުހިއްމެވެ. އަދި އެއުސޫލު ތަކަކީ ތަންފީޒުކުރެވޭ ތަފާތުކުރުމެއް ނެތް އުސޫލުތަކަކަށްވެސް ވާންއެބަޖެހެއެވެ. މިކަންތައް ތަކަކީ ޅައުމުރުގައި ކުދިންނަށް ގަބޫލުކުރަން އުނދަގޫ ކަންތައްތަކެއް ކަމުގައިވީ ނަމަވެސް ކުދިން ބޮޑުވެ އެކިދިންނަށް ހެޔޮނުބައި ވިސްނެން ފެށުމުން މިފަދަ ފިޔަވަޅުތަކަކީ އެކުދިންގެ މުސްތަގްބަލަށްޓަކައި މައިންބަފައިން ކޮންމެހެން އަޅަންޖެހޭނެ މުހިއްމު ފިޔަވަޅު ތަކެއް ކަމަށް ގަބޫލްކުރެވޭނެއެވެ.

ރަނގަޅު ތަރުބިއްޔަތު ދިނުމާއި ރީތި އަޚްލާގީ ސިފަތައް ކުދިންނަށް ދަސްކޮށްދިނުމަކީ ކާމިޔާބު މަންމައަކާއި ބައްޕައެއްގެ ޒިންމާއެއްނަމަވެސް މައިންބަފައިންނަކީ ކުދިންގެ އެންމެ ގާތް އެކުވެރިންކަމުގައި ވާން ޖެހެއެވެ. އަދި މީގެ އިތުރުން މައިންބަފައިންނަށް ކުރަންޖެހޭ އިހްތިރާމާއި ގަދަރު އެކުދިންނަށް ދަސްކޮށްދޭންވެސް ޖެހެއެވެ. ކުދިންގެ ފަރާތުން ހިތްހަމަނުޖެހޭ ކަމެއް ދިމާވުމުން އެއްޗެހިގޮވައި ތަޅައިހެދުމުގެ ބަދަލުގައި، ކެތްތެރިކަމާއި އެކު އެކުދިންނަށް ނަސޭހަތް ދޭން ޖެހެއެވެ. އަދި ހަމަ އެއާއި އެކު ކުދިންނަށް ދޭ އަދަބަކީ ޖިސްމާނީ ގޮތުން ބޮޑެތި އަނިޔާ ނުލިބޭ ބޭނުންތެރި އަދަބު ތަކެއް ކަމުގައިވެސް ވާން ޖެހެއެވެ. ކުއްޖާ އަކީ ކިތަންމެ ބަސްނާހާ ކުއްޖެއް ނަމަވެސް މިގޮތުން ކަނޑައެޅޭ އުސޫލުތަކާއި ދަސްކޮށްދެވޭ ޑިސިޕްލިން ތަކުގެ ސަބަބުން ކުއްޖާ ގެ އުޅުމަށް ބޮޑެތި އަސަރުތަކެއް ކުރުވާނެއެވެ.

ކަނޑައެޅޭ އުސޫލުތަކާއި މިންގަނޑުތަކާއި ޚިލާފްވުމަށް ވީހާވެސް ބޮޑަށް ކުދިން މަސައްކަތް ކުރާނެކަން ދެނެގަނެ ހަމަހަމަ ކަމާއި އިންސާފްވެރިކަމާއި އެކު މިކަންތައް ދަމަހައްޓައި ނުލައިފިނަމަ މިފަދަ ކަންތައްތަކަކީ މުޅިން ބޭކާރު ކަންތައް ކަމަށްވެދެއެވެ. އެހެންކަމުން ކުދިން އަމަލުކުރަންޖެހޭ އަސާސީ އުސޫލުތަކެއް ކަނޑައެޅުމަށްފަހު ދެވޭ އަދަބުތަކާއި ފާހަގަ ކުރެވޭ ރަނގަޅު ކަމެއް ކުރުމުން ދެވެ ހަދިޔާ ތަކަކީ ވަކި ކުއްޖަކާއި ވަކި ހާލަތެއް އިސްތިސްނާ ނުކޮށް ހަމަހަމަ ކަމާއި އެކު ތަންފީޒުކުރެވޭ ކަންތައްތައް ކަމުގައި ވާން ޖެހޭނެއެވެ. މިސާލަކަށް ކުއްޖަކު ރުޅި އައިސްގެން ބާރަށް ދޮރުޖެހުމަކީ މަނާ ކަމެއް ކަމަށް ކަނޑައަޅައިފައިވާނަމަ އެންމެ ފަހަރަކުވެސް ދޮރުބާރަށް ލެއްޕިޔަ ދީގެން ނުވާނެއެވެ. ކުއްޖާ ލަސްވެގެން ރޭގަނޑު 9 ގެ ކުރިން ގެއަށް ވަންނަންޖެހޭނެކަމަށް ކަނޑައަޅާފައިވާނަމަ 9:05 ވުމުން ގެއަށް ވަނުމަކީ މައްސަލައެކެވެ. މިގޮތަށް ވަކި އުސޫލުތަކެއް ހިފެހެއްޓިއްޖެ ކަމަށް ވާނަމަ އޭގެ ހޮޔޮ ފައިދާ ކުދިންނަށް ލިބިގެންދާނެއެވެ.

މުޖްތަމައުގައި މިހާރުހުރި ގިނަ މައްސަލަތަކަކީ ބެލެނެވެރިންގެ ވަރަށް ބޮޑު އިހުމާލެއްގެ ސަބަބުން ކުރިމަތިވެފައިވާ ކަންތައްތަކެއް ކަމުގައި ގަބޫލު ކުރެވެއެވެ. އެހެންކަމުން މިފަދަ ކަންތައްތައް ހައްލުކުރުމަށްޓަކައި ހަރުދަނާ ފިޔަވަޅުތައް ނޭޅިއްޖެނަމަ ކުދިންނަށްޓަކައި މައިންބަފައިން ކުރަމުންދާ ބުރަ މަސައްކަތުގެ ފައިދާ ނުލިބި ކުދިން ގެ މުސްތަގްބަލް ހަލާކުވުމަކީ އެންމެ ގާތުގައިވާ ކަންތަކެވެ.