ޒާތީ ތައައްސަބުތައް ދުރުކޮށް އެންމެން އެކަތިގަޑަކަށް ވަމާހިނގާށެވެ.
ގައްދޫގެ މުސްތަގްބަލަށްޓަކައި މިއީ ހަގީގަތުގައިވެސް ކުރަންޖެހިފައިވާ ކަމެކެވެ
ތަރައްޤީއަށްޓަކާ ކުރެވޭ އެއްވެސް ކަމެއްގައި ސިޔާސީ ކުލަ ޖެހިގެން ނުވާނެއެވެ. އަޅުގަނޑުމެން ފަޚުރުވެރިކަމާއެކު އެރަށަކަށް ނިސްބަތްވާ ގައްދޫއަކީ މީގެ އެތަކެއް އަހަރުތަކެއްކުރިން ދިވެހި ރާއްޖޭގައި ތަރައްޤިއާއި ތަހުޒީބުގެ ގޮތުން އެންމެ ކުރިއަރާފައިވާ އެއް ރަށެވެ. އެއް ޒަމާނެއްގައި ހުވަދު އަތޮޅުގެ ވެރިކަން ކުރި ރަށްވެސް މެއެވެ. އެންމެ ފުރަތަމަ ދިވެހި ރާއްޖޭގައި އުފެދުނު ސައުދާގަރު ގެ އުފަން ރަށެވެ. އެންމެ ފުރަތަމަ ރަން "ފައުލާއެއް" ގެންގުޅުނު މީހާގެ ވެސް އުފަން ރަށެވެ. ދިވެހި ސަރުކާރަށް އެންމެ ފުރަތަމަ ނައިލޯނު ވަލެއް ގަނެދިން މުއްސަނދި މަހުޖަނުގެ އުފަން ރަށެވެ. ކުރުކޮށް ދަންނަވާނަމަ ދިވެހި ރާއްޖޭގައި އެ ޒަމާނުގައި އެންމެ މުއްސަދި އެއް ރަށެވެ. އެހެން ނަމަވެސް މިއަދު އެހެންތޯއެވެ؟ އެ މުއްސަނދިކަން ކޮބައިބާއެވެ.؟
ގައްދޫއަކީ ދެކުނުގެ ބޮޑު ބަޣާވާތުގައި ދިވެހި ސަރުކާރާ އެއްކޮޅަކަށް އޮތް ހަމައެކަނި ރަށޭ ބުނާތީ އަހަމެވެ. ކައިރި ރަށް ރަށުގެ މީހުން ފިހުނު ތޮޅި މަހާއި މަޝަންދަތި ފަދަ ތަކެތި ހިފައިގެން ރިޔަލު އޮޑީގައި ގައްދުއަށް އައިސް އެތަކެތި ވިއްކި ހަނދާން އިއްޔެ ވީ ކަމެއްހެން ހަނދާނުގައި އެބަހުއްޓެވެ. އެހެންނަމަވެސް މިއަދު އެ މުއްސަނދިކަން ކޮބައިތޯއެވެ.؟ ރަށް މިވަނީ ބައިބައިވެފައެވެ. މުއްސަދިންނާއި ފޯރާ މީހުން އެބަތިއްބެވެ. އެހެން ނަމަވެސް ރަށަށް އޮތީ ކޮން ފައިދާއެއް ހެއްޔެވެ؟ މުޅި ރަށަށް މިއަދު މިވަނީ ސިޔާސީ ވައިރަސްއެއް ފެތުރިފައެވެ. ތަރައްޤީގެ މަގުގައި ކުރެވެމުންދާ ކޮންމެ ކަމަކަށް " ސިޔާސީ ވައިރަސް" ދަނީ ވަންނަމުންނެވެ. އެހެން ނަމަވެސް މިއީ ކަންތައް ހިނގަން ޖެހޭ އުސޫލެއް ނޫނެވެ. އިންތިޚާބު ތަކުގައި ފައިސާވެރިން ވާދަކުރުމަކީ މައްސަލައެއް ނޫނެވެ. އަދި އެ ރަށެއްގެ އުފަން ދަރިޔަކު އެއިންތިޚާބުގައި ވާދަކުރުމުން އެ ކަމަށް ތާއީދުކޮށް ހޮވުންވެސް އެއީ ޤައުމީ އަދި ފަރުދީ ވާޖިބެއް ކަމުގައި ދެކެމެވެ. އެހެން ނަމަވެސް އޭގެ ނަތީޖާ ފެންނަން ޖެހޭނީ ވަކި ބަޔަކަށް ނޫނެވެ. މުޅި ރަށަށެވެ. މިއަދު ގައްދޫގައި މުއްސަނދިންތަކެއް ތިބިއިރު އެމުއްސަދި ކަމުގެ އެއްވެސް ކުލަވަރެއް ގައްދޫއިން ފެންނާކަށްނެތެވެ. އެކަކު ގައްދޫ އަށް ތަރައްޤިގެ މަގުގައި ޚިދުމަތެއް ކޮށްދޭން އުޅެފިނަމަ ދެންތިބި ބައެއްގެ މޫނު ދާނީ ފޭއަށެވެ. އެކަކަށް ނުވި ކަމެއް އަނެކަކު ކުރުމަކަށް ހުއްދައެއް ނެތެވެ. މިއީ މިއަދު އަޅުގަނޑުމެންގެ ހާލަތު ހުރި ގޮތެވެ.
ލޯބިވާ ގައްދޫގެ ފަރުދުންނެވެ. ސިޔާސީ ވާދަވެރިކަމާއި ޒާތީ ތަޢައްސުބަކީ އޮންނަން ޖެހޭނެ އެއްޗެއްނޫނެވެ. އެހެން ނަމަވެސް ރަށުގެ ތަރައްޤިއަށް ކުރެވޭ ކަންތައްތަކުގައި އެންމެ ނިކަމެތި މީހާ އާއި މަހުޖަނުންވެސް އެއްގަލަކަށް އަރަންޖެހެއެވެ. މަޒީގައިވެސް ކަން ހިނގާފައިވަނީ އެފަދަ ގޮތަކަށެވެ. ހުވަދޫ ބަޢާވާތެވެ. މުޅި ތިން އަތޮޅުގެ މައްޗަށް ގައްދޫ ކުރި ހޯދި ގޮތުގެ ވާހަކަ އެއީ މަޝްހޫރު ވާހަކައެކެވެ. މިފަދަ ހާދިސާތަކުން އިބްރަތް ހާސިލް ކުރުމަކީ މިއަދު އަޅުގަނޑުމެން ކުރަން ޖެހޭ ކަމެކެވެ. އެކުވެރިކަމަކީ ގަދަފަދަ ބާރެކެވެ. ވަކިވެގަތުމަކީ ނިކަމެތި ކަމެކެވެ.
ރަށްޓެއްސަކަށް އީމެއިލް ކުރުމަށް
ޕްރިންޓް ކުރުމަށް
ހަމަ އެކަނި ޓެކްސްޓް
ކޮމެންޓްސް ފުނުއްވާ