ގައްދޫގެ ނަރުދަމާނިޒާމްގެ މަސައްކަތް ފެއްޓޭނީ ކިހާ ހިސާބެއްގައިބާ؟

ނަރުދާގެ މައްސަލައިގައި ރައްޔިތުން މުޒާހަރާ ކުރަނީ

ރައްޔިތުން ތިބީ ފައްޓާނެ ދުވަހެއްގެ އިންތިޒާރުގައި.

 ގައްދޫގެނަރުދަމާ ނިޒާމްގެ އަމަލީމަސައްކަތް ޔަގީން ކަމާއި އެކު ފެއްޓޭނެ ތާރީޚެއް އަދި އެނގިފައެއް ނެތެވެ. މިމަސައްކަތް ވަރަށް އަވަހަށް ފެއްޓިދާނެ ކަމުގެ އިންތިޒާރު ގައި ރައްޔިތުން ތިއްބާ ރެޑްކްރޮސް އިން ވަނީ ގައްދޫގެ ނަރުދަމާގެ މަސައްކަތް އެމީހުންގެ ލިސްޓުން އުނިކޮށްފައިވާކަން އަންގާފައެވެ. ސަބަބެއްކަމަށް އަންގާފައި ވަނީ 3 ރަށުގެ މަސައްކަތް އެއްފަހަރާ ފެއްޓޭ ވަރުގެ ބަޖެޓެއް އެމީހުންގެ އަތުގައި ނެތުމުގެ ސަބަބުން ރެޑްކްރޮސް ގެ ފަރާތުން މަސައްކަތް ކުރަންވީ ކޮންކޮން ރަށްތަކެއްގައިތޯ ސަރުކާރުގައި ދެންނެވުމުން ސަރުކާރުން ކަނޑައެލުއްވި ދެރަށަކީ ގއ. ވިލިނގިއްޔާއި ގއ. ދާންދޫކަމަށް ވުމެވެ. މިހެން މިކަން ވުމުގެ ސަބަބުން ގައްދޫގެ ރައްޔިތުން ވަނީ ވަރަށްބޮޑަށް މާޔޫސްވެ އަދި ވަރަށްބޮޑަށް ނުރުހުން ފާޅުކޮށް މުޒާހަރާ ވެސް ކޮށްފައެވެ. މިވަގުތު ގައްދޫ އަށް ދިމާވެފައިވާ އެންމެ ބޮޑު އެއްމައްސަލަ ކަމަށްވާ ނަރުދަމާގެ މަސައްކަތް ވިލިގިއްޔާއި ދާންދޫގެ މަސައްކަތާއި އެއްކޮށް ފެއްޓޭތޯ މަސައްކަތް ކުރާކަމަށް ސަރުކާރުން ވިދާޅުވެފައި ވިޔަސް އެމަސައްކަތް އެގޮތަށް ކުރިޔަށް ގެންދާނެ ކަން ރައްޔިތުން ފުރިހަމަ އަށް ގަބޫލެއް ނުކުރެއެވެ. ސަބަބަކީ ގައްދޫ އަކީ އާބާދީ ގޮތުން ބޮޑު ރަށަކަށް ވެފައި ރަށުގެ ފެނުގެ ހާލަތު ވަރަށްބޮޑަށް ގޯސްވެފައިވާއިރު ގައްދޫ އަށް ވުރެ ބޮޑަށް އެހެން ރަށްތަކަށް އިސްކަންދީފައިވާތީއެވެ. އެހެންނަމަވެސް ގައްދޫގެ މަސައްކަތް ވިލިނގިއްޔާއި ދާންދުއާއި އެއްކޮށް ފައްޓާނެ ކަމުގެ ޚަބަރު ލިބިފައި ވުމުން އެކަމާއި ވެދު ރައްޔިތުން ތިބީ ކޮންމެވެސް ވަރެއްގެ އުންމީދެއްގައެވެ. ނަރުދަމާގެ މަސައްކަތް އަވަސް މުސްތަގްބަލެއްގައި ފައްޓާނެ ކަމަށް ކުރިން އަންގާފައި ވުމުގެ ސަބަބުން ރައްޔިތުން ވަނީ އަލަށް ހަދާ ފާޚާނާ ތަކުގެ ނަރުދަމާ ނިޒާމް ވަރަށް އާދައިގެ ގޮތަކަށް ކޮށްފައެވެ. އެހެންވުމުގެ ސަބަބުން މިހާރު އެގޮތަށް ބޭނުން ކޮށްފައިވާ ފީފާ ތަކާއި އެހެންވެސް ތަކެތި ފުރި ވަރަށް ބޮޑު ދަތިތަކެއް ރައްޔިތުންނަށް ކުރިމަތި ވަމުންދެއެވެ. އެހެން ކަމުން މިމަސައްކަތް ވީހާވެސް އަވަހަކަށް ފެޓެވުމަކީ ރައްޔިތުންގެ ވަރަށް ބޮޑު އުންމީދެކެވެ.