ވަތަބަނޑޭރި މުބާރާތުގެ ފޯރި ގަދަވަނީ

މިދިޔަ އަހަރުގެ މުބާރާތުގެ ތެރެއިން

ބައެއް ޓީމް ތަކަށް ރާއްޖެއިން ބޭރުން ކުޅުންތެރިން ހޯދުމުގެ މަސައްކަތް މިހާރުވެސް ފަށައިފައިވާ ކަމަށްވޭ.

އަސަރީ ކްލަބްގެ ފަރާތުން ކޮންމެ އަހަރެއްގެ އަހަރު ޗުއްޓީގައި ބާއްވަމުން ގެންދަވާ ވަތަބަނޑޭރި މުބާރާތް ކުރީގެ އަހަރުތަކާއި ޚިލާފަށް މިއަހަރު މާބޮޑުތަން ވެސް ފޯރި ގަދަވާނެކަމަށް ބެލެވެން ފަށައިފިއެވެ. ސަބަބަކީ މުބާރާތުގެ އަގު ކުރިއަށް ވުރެ މާބޮޑުތަންވެސް ރަނގަޅު ކޮށްފައިވުމުގެ ސަބަބުންނާއި، އަންހެން ޑިވިޝަންގެ ތަށި، ކުރަނގި ޓީމް މިއަހަރު ކާމިޔާބު ކޮށްފިނަމަ އެޓީމަށް މުބާރާތުގެ ތަށި މިލްކުވާތީވެ އެހެންޓީމް ތަކުން ކުރަނގި ޓީމަށް ތަށި ކާމިޔާބް ވިޔަނުދިނުމަށްޓަކައި ވަރަށް ބޮޑަށް މަސައްކަތް ކުރާނެކަމަށް ބެލެވޭތީއެވެ.

މުބާރާތުގެ ކުރީގެ އަގަކީ ކޮންމެ ޑިވިޝަނަކަށް 5000 ރުފިޔާ ކަމުގައި ވީ ނަމަވެސް މިހާރު ވަނީ އެއަގު ކޮންމެ ޑިވިޝަނަނަކަށް 15000 ރުފިޔާ އަށް ބޮޑުކޮށްފައެވެ. ސަބަބަކީ މިދިޔަ އަހަރު، މުބާރާތުގެ ފެންވަރު ރަނގަޅު ކުރުމަށްޓަކައި ޓީމް ތަކުން ވަރަށް ބޮޑެތި ޚަރަދު ތަކެއް ކޮށްފައިވާތީ އާއިއެކު މިފަދަމުބާރާތަކަށް 5000 ރުފިޔާ އަކީ އެކަށީގެންވާ އަގެއް ކަމަށް ގަބޫލުނުކުރެވޭތީއެވެ. މިގޮތުން ބައެއް ޓީމް ތަކުން ވަނީ މިދިޔަ އަހަރު ރާއްޖޭގެ ގައުމީ ޓީމްގެ ކުޅުންތެރިންނާއި އަދި މިނޫންވެސް ރާއްޖޭގެ ވަރަށް ނަން މަޝްހޫރު ކުޅުންތެރިން މުބާރާތަށް ގެނެސްފައެވެ. އެހެން ކަމުން މުބާރާތުގެ އަގު ބޮޑުކޮށްފައިވަނީ ޓީމްތަކުގެ ޕްރެޝަރވެސް ވަރަށް ބޮޑަށް އޭގައި ހިމެނިގެން ކަމަށް ވަރަށް ބޮޑަށް ބެލެވެއެވެ. މިދިޔަ އަހަރު ބައެއް ޓީމް ތަކުން ވަނީ މުބާރާތަށް ގާތްގަނޑަކަށް 30،000 ރުފިޔާ ޚަރަދު ކޮށްފައި ކަމަށް އެޓީމް ތަކުން ބުނެފައިވެއެވެ. މިދިޔަ އަހަރުގެ މުބާރާތުގެ ފެންވަރު އެހާބޮޑަށް ރަނގަޅުވިކަމަށް ބެލެވެނީ މުބާރާތުގެ ދެ ޓީމެއްގެ ދެމެދުގައި އުފެދުނު ވާދަވެރިކަމެއްގެ ސަބަބުން އެއްބަޔަކަށްވުރެ ފެންވަރު ރަނގަޅު ކުޅުންތެރިން އެމީހެއްގެ ޓީމަށް ގެނައުމަށް މަސައްކަތް ކުރުމުގެ ސަބަބުން ކަމަށްވާތީވެ، ޓީމް ތަކުން ދުރާލާ މިފަދަ ބޮޑު ޚަރަދު ތަކެއް ކުރަން ތައްޔާރުވެފައި ނެތުމުގެ ސަބަބުން މުބާރާތް ނިމުނު އިރު އެ ޓީމް ތައް ވަނީ މާލީ ގޮތުން ވަރަށް ބޮޑަށް ދަށަށް ގޮސްފައެވެ.

މައުލޫމާތު ލިބޭ ގޮތުގައި މިއަހަރުގެ މުބާރާތުގެ ފޯރި މިހާ ގަދަވުމުގެ އެއްސަބަބަކީ މިދިޔަ އަހަރުގެ މުބާރާތުގެ ފޯރި އެހާ ގަދަވުމުގެ ސަބަބުން މިއަހަރު މުބާރާތަށް ޚަރަދު ކުރުމަށް ގައްދޫގެ ކަމުވޮށިގެންވާ ވަރަށް ގިނަ ބަޔަކު ބޭނުން ވެފައިވާތީއެވެ. މީގެ އިތުރުން ބައެއް ޓީމް ތަކުން މިހާރުވެސް މުބާރާތަށް ތައްޔާރުވުމުގެ ގޮތުން ފަންޑް ހޯދުމާއި ސްޕޮންސަރ ހޯދުމުގެ ކަންތައް ކުރިޔަށް އެބަގެންދާކަމަށް މައުލޫމާތު ލިބިފައިވެއެވެ. އަދި ބައެއް ޓީމްތަކުން ރާއްޖެއިން ބޭރުގެ ކުޅުންތެރިން ހޯދުމުގެ މަސައްކަތް މިހާރުވެސް ފަށައިފައިވާ ކަމަށް ވެސް ޚަބަރު ލިބިފައިވެއެވެ.

މިއަހަރު ގެ މުބާރާތް ބައްލަވާލެއްވުމަށްޓަކައި ރަށުން ބޭރުގައި ދިރިއުޅޭ ގިނައަދަދެއްގެ މީހުންނާއި ކައިރި ރަށްރަށުގެ ބައެއް މީހުން، ގައްދުއަށް ވަޑައިގަންނަވާނޭކަމަށް ބެލެވެއެވެ. މިދިޔައަހަރުގެ މުބާރާތުގައި ކޮންމެވެސް ވަރަކަށް މައްސަލަތައް ކުރިމަތި ވިޔަސް ޖުމްލަ ގޮތެއްގައި މިދިޔަ އަހަރުގެ މުބާރާތަކީ ވަރަށް ކާމިޔާބު މުބާރާތެއް ކަމަށް ގަބޫލުކުރެވެއެވެ. މި މުބާރާތުގައި ގައުމީ ޓީމް ގެ ކެޕްޓަން ކަމުގައިވާ ޔުމްނާއާއި ނާޒިމާ ވަނީ ކުރަނގި ޓީމަށް  ކުޅެފައެވެ.